Мәселен, соның бірі – мектепке дейінгі білім беру орындарының санын арттыру. Осы мақсатта биыл Маңғыстау облысында 14 балабақша салу жоспарланған еді. Бүгінде оның 7-і ел игілігіне қызмет көрсетуді бастап кетті. «AMANAT» партиясы Маңғыстау облыстық филиалының төрағасы Нұрбек Қарасаев пен облыстық мәслихат депутаты Абзал Марат Ақтау қаласында жаңадан ашылған балабақшаларды аралап, кәсіпкерлердің жұмысымен танысты. Ақтау қаласындағы Шығыс-3 шағынауданындағы 95 орындық Padıshah, 29 шағынауданындағы 100 орындық «Шах Village garden» балабақшасы иелерінің бұл бірінші балабақшасы емес. Бұл кәсіп түрін ұршықша иіріп жүрген кәсіпкерлермен тілдескен «AMANAT» партиясы Маңғыстау облыстық филиалының төрағасы Нұрбек Қарасайұлы заңдылық жағынан қандай да бір көмек қажет болған жағдайда партия қолдауға, заң аясында кеңес беруге дайын екенін айтты. Кәсіпкерлер балабақша жұмысымен, балабақша ашу жолындағы тәжірибесімен бөлісіп, қолдауға дайын партияластарына алғыс білдірді.
Ал Жамбыл облысында бұл тұрғыдағы басты мақсат – өңір азаматтарын басыбайлы баспанамен қамтасыз етуге ықпал ету. Партияның Сайлауалды бағдарламасын іске асыру жөніндегі өңірлік Жол картасында аймақты тұрғын үй, жер учаскелерін инфрақұрылыммен қамтамасыз ету айқын көрсетілген. Осы орайда Байзақ ауданында партияның облыстық филиалы жанындағы Өңірлік даму жөніндегі аймақтық кеңестің көшпелі отырысы өтіп, аталған мәселелердің іске асырылу барысы талқыланды. Басқосуда Байзақ ауданы әкімінің орынбасары Дулат Жақыпбековтың баяндамасы тыңдалып, тұрғын үй, жер учаскелерін инфрақұрылыммен қамтамасыз ету мәселелері назарға алынды.
Бүгінде ауданда тұрғын үй кезегінде 2 420 адам, ал жер кезегінде 12 226 азамат тұр. Кезекте тұрған азаматтардың сұраныстарын қанағаттандыру мақсатында тұрғын үй алқаптарын қажетті инженерлік инфрақұрылыммен қамтамасыз ету бойынша жұмыстар атқарылуда. Яғни, 2018 жылы Жетібай, Қостөбе және Мырзатай ауылдарындағы алқаптарға аудандық бюджет есебінен инфрақұрылым жүргізілген. Нәтижесінде, 2019 жылы жоғарыда көрсетілген елді мекендерден кезекте тұрған азамат-тар жер телімдерімен қамтылған.
«Өздеріңіз білетіндей, маусым айында Сарыкемер ауылында көпқабатты 4 тұрғын үйдің құрылысы басталған болатын. Бұл үйлер биылғы жылдың аяғында үй кезегінде тұрған азаматтарға берілетін болады. Сонымен қатар осы үйлердің құрылысын жүргізіп жатқан «Бином» ЖШС келер жылы қосымша тағы 2 үйді өз қаражаты есебінен салу жоспарлануда», – деді аудан әкімінің орынбасары.
Осындай жұмыстар жүргізіліп жатқанына қарамастан мәселелер де жоқ емес. Атап айтқанда, ол инфрақұрылым жүргізу барысында негізгі су, жарық және көгілдір отынның кейінге шегеріліп қалуы. Салынған жолдың да сапасыз салынуы тұрғындар көңілін күпті етеді. Бір айта кетерлігі, инфрақұрылымнан бөлек байланыс сапасына мән берілуі қажет. Тағы бір тілге тиек ете кетерлік жайт, жер телімдері кезекте тұрған азаматтарға берілудей-ақ беріліп жатыр. Дей тұрғанмен, ол учаскелерге халықтың үй салу деңгейі төмен. Нәтижесінде, жүргізілген инфрақұрылым уақытына жетпей істен шығып, тіпті жекелеген бөлшектерінің қолды болу фактілері тіркелуде. Сондықтан жер телімін беруде алдымен тұрғындардың әлеуметтік әлеуетін ескеру қажет-ақ.