LDUBB Boxing YouTube бокс арнасының авторы Буг Уильямс әлеуметтік желіде WBO және IBF нұсқалары бойынша орта салмақтағы әлем чемпионы, қазақстандық боксшы Жәнібек Әлімханұлына (15-0, 10 КО) үндеу жариялады, – деп хабарлайды Aikyn.kz Sports.kz-ке сілтеме жасап.
Уильямс Жәнібек Әлімханұлының Boxingscene.com порталында жарияланған WBC нұсқасы бойынша орта салмақтағы «уақытша» белбеу иегері, Доминикан Республикасының спортшысы Карлос Адамес (23-1, 18 КО) жайлы айтқан сынына жауап берді.
«Ақпан айындағы жекпе-жекке дайындал», – деп жазды Уильямс X әлеуметтік желісінде.
Осылайша, Адаместің 2024 жылдың қысында жекпе-жек өткізуге дайын екенін меңзеді.
Еске сала кетейік, Карлос Адамес әлеуметтік желіде Жәнібек Әлімханұлын жекпе-жекке бірнеше рет шақырған болатын. Бірақ қазақстандық спортшы өзі толыққанды әлем чемпионы болмағандықтан, доминикандықпен жұдырықтасуға құлшыныс танытпай отыр.