Айта кетейік, бұл ойын мұнайлы қалада алғаш рет өткізіліп отыр. Оған қала әкімі Жансейіт Қайнарбаев арнайы қатысты. Шаһар басшысы бүгінгі лига қала үшін тарихи сәт болғанын айтады.
– Жаңаөзенде ашық футболдан алғаш рет жарыс өтіп жатыр. Алдымен осы ойынның өтуіне үлкен септігін тигізген облыс әкімі Нұрлан Ноғаевқа алғысымды білдіремін. Бұл ойын біздің жастарымызға, өскелең ұрпаққа спорттың жаңа бағытын көрсетіп, серпін береді деген үміттемін. Футбол халық арасында жоғары танымалдылыққа ие болуда. Сондықтан ары қарай футболды Жаңаөзен қаласында дамытуды жалғастырамыз деген сенімдемін, – деді Жансейіт Қайнарбаев.
Жарыс Жаңаөзен қаласындағы Әмин Тұяқов атындағы стадионда өтті. Ойынға мыңдаған жанкүйерлер қатысып, жерлестерімізге қолдау көрсетті. Бірінші лига нәтижесінде, «Каспий» футбол клубы 4:1 есебімен жеңіске жетті. «Каспий» футбол клубының басшысы Нұржан Жалғасбаев жарысқа спортшылардың дайындығы жоғары деңгейде болғанын атап өтті.
– Бірінші лигаға ақпан айынан бастап дайындықты бастадық. Бұл «Каспий» футбол клубы үшін жыл басынан бері екінші ойын болды. Алғашқы ойын Арыс қаласында өтіп, жеңіспен оралған болатынбыз. Дәл сол нәтижені бүгін де қайталадық, – деді Нұржан Жалғасбаев.
Ойын аяқталған соң екі команданың өкілдері баспасөз конференциясына қатысып, бүгінгі лига туралы өз пікірімен бөлісті. Бұдан былай «Каспий» футбол клубының өз жерімізде болатын өткізетін ойындарының барлығы Жаңаөзен қаласында өтетін болады дейді мамандар.
– Араға 32 жыл салып, қаламызға үлкен футбол қайта оралды. Мен осындай жоғары деңгейдегі жарысқа алғаш рет келіп тұрмын. Әсерімді сөзбен айтып жеткізу қиын. Ойын кезіндегі атмосфера да тым бөлек екен. «Каспий» футбол клубының жанкүйері екенімді мақтаныш тұтамын. Мен де жанымдағы достарым да барлығымыз ақтаулық командаға сенеміз. «Каспий», алға! Спортшыларымыз жақсы ойын көрсетіп жатыр. Болашақта бұл командадан үлкен жеңістер күтеміз. Бүгінгідей жарыстар Жаңаөзенде жиі өтіп тұрса, жанкүйер ретінде алғысымыз шексіз, қуаныштымыз, – деді жанкүйер Ернар Нұрланұлы.
Тағы бір қуанышты жаңалық, қала әкімдігі халықтың футболға деген зор қызығушылығын көріп, Жаңаөзенде «Каспий» футбол орталығы бөлімшесінің ашуға қолдау білдіретінін айтты.
Сағындық РЗАХМЕТОВ,
Маңғыстау облысы