Бұл – жастарды спортқа, бәсекелестікке қызығушылығын арттыру, жан-жақты әрі талантты жас футболшылар үшін бастапқы алаң ұсынуды мақсат еткен бірегей және ауқымды спорттық жоба. Жоба өзінің ауқымдылығы мен бірегейлігіне байланысты отандық және шетелдік аудиторияның қызығушылығын тудырды. Аталған шара қазақстандық футболды сапалы жаңа деңгейге шығару процесін бастауға көмектесетін дәл импульске айналып жатыр.
Super bol қазақстандық әлеуметтік жобасының финалдық матчының салтанатты ашылу рәсіміне қала әкімі Ғабит Сыздықбеков, Президент жанындағы Орталық коммуникациялар қызметінің басшысы Асқар Омаров, жобаның бас менеджері Давид Лория қатысты.
Сонымен бірге биыл жоба ауқымдылығына байланысты шетелдік аудиторияның елімізге деген қызығушылығы артты. Бұл матчқа еуропалық, азиялық және қазақстандық клубтардың скауттары, сондай-ақ Челси мен Франция құрамасында ойнаған әлемдік футболдың супер жұлдызы Флоран Малуда, сондай-ақ ПСЖ мен Сенегал құрамасының бұрынғы ойыншысы Халилу Фадига арнайы келді.
Үшінші мегаполис басшысы Ғабит Әбдімәжитұлы КСРО спорт шебері Евстафий Пехлеваниди мен басқа да шетелдік қонақтарға шапан жауып, құрмет көрсетті. Құрмет көрсетілгендердің қатарында матчқа арнайы келген әлем футболының жұлдыздары Флоран Малуда мен Халилу Фадига да бар.
Президент жанындағы Орталық коммуникациялар қызметінің басшысы Асқар Омаров Мемлекет басшысы балалар футболын дамытуға көңіл бөліп жатқанын, мұндай жоба бұқаралық спортты дамыту, жас футболшыларға зор серпін беретінін атап өтті. Ал қала басшысы мегаполисіміздің дамуы мен гүлденуіне елеулі үлес қосқан азаматтарға «Шымкент қаласының құрметті азаматы» атағын табыс етті. Олардың қатарында белгілі режиссер, «Ника» сыйлығының және Канн кинофестивалінің лауреаты Сергей Дворцевой және КСРО спорт шебері, қазақ футболының аңызы Евстафий Пехлеваниди бар. Танымал екі тұлға да Шымкент қаласында дүниеге келген.
Гранд финалда кеңестік және еліміздің футболының аңыздары Вахид Масудов пен Дмитрий Огайдың командалары кездесті. Сонымен, үлкен финалда Вахид Масудовтың командасы 3:1 есебімен жеңіске жетті.
Сондай-ақ үзіліс кезінде отандық жұлдыздар өнер көрсетіп, көрермендер үшін футболдың үздік дәстүрлеріне айналған түрлі іс-шаралар ұйымдастырылды.
Назгүл НАЗАРБЕК,
Шымкент қаласы