Ішкі ғана емес сыртқы әріптестікте де аймақтың әлеуеті жоғары бағаланып отыр. Өңірдегі өнімді жұмыстар мен күн тәртібіндегі мәселелер облыс басшылығының жіті назарында.
Аралық нәтиже пысықталған межелі жиын
Биылғы 5 айда Абай облысының қысқамерзімді экономикалық индикаторы 102,7%-ды құрады. Аталған көрсеткіш жалпы өңірлік өнімнің 60%-дан астамын құрайтын 6 негізгі саланың (ауыл шаруашылығы, өнеркәсіп, құрылыс, сауда, көлік және байланыс) дамуын көрсетеді. Межелі кезеңде 404,7 мың шаршы метр тұрғын үйді іске қосу жоспары орындалған, соған сәйкес алдағы жартыжылдықта 106,2% өсім күтілуде.
Алдын ала деректер бойынша, бүгінде облыс бюджетінің кіріс бөлігі 64 212,7 млн теңгені, ал жоспар 57 199,6 млн теңгені құрады. Бұл бюджеттің орындалу көрсеткіші – 112,3% деген сөз. 2024 жылға арналған облыстың түзетілген жылдық бюджеті 464 505,4 млн теңге болса, оның 322 695,7 млн теңгесі облыстық бюджетке, ал 141 809,7 млн теңгесі қалалар мен аудандардың бюджеттеріне тиесілі.
Осынау деректер мен дәйектер Абай облысының әкімі Нұрлан Ұранхаевтың төрағалығымен таяуда әкімдікте өткен отырыста айтылды. Жиында бірінші жартыжылдықтағы әлеуметтік-экономикалық даму қорытындылары талқыланып, биылғы жылдың екінші жартысына жоспарланған міндеттер қаралды. Отырыс барысында бірінші жартыжылдықтағы қаражатты игеру, құрылыс сапасын бақылау және Ұлттық құрылтайдың ІІІ отырысындағы Мемлекет басшысы тезистерінің негізгі бағыттарын түсіндіру бойынша жүргізілген жұмыстар туралы баяндалды.
«Отырыста қаралған барлық мәселелерге мұқият мониторинг жүргізе отырып, тұрақты бақылау қажет. Жұмыс өте көп және әр мәселеге жауапкершілікпен қарауға тиіспіз. Жүйелі әрі жоспарлы жұмыс туындаған мәселелерді тиімді шешуге және өңірдің әлеуметтік-экономикалық дамуында оң нәтижелерге қол жеткізуге мүмкіндік береді», – деді Нұрлан Ұранхаев.
Абай облысының бақылау басқармасы жыл басынан бері жеке және заңды тұлғалардан, мемлекеттік және құқық қорғау органдарынан түскен 1 122 өтінішті қараған. Жоспардан тыс 32 тексеру жүргізіліп, нәтижесінде 94 әкімшілік құқықбұзушылық туралы хаттама жасалып, 32 нұсқама енгізілген. 14 нысанда жобалық-сметалық құжаттаманың бұзылуы, рұқсат беру құжаттарының жоқтығы анықталды. Олардың сегізі сот шешімімен бөлшектелетін болады.
Сондай-ақ жиында жаңадан пайдалануға берілген су құбырларының санитарлық-эпидемиологиялық қорытындысын алу және өндірістік бақылау шеңберінде ауызсудың сапасына бақылау жүргізуді қамтамасыз ету мәселелеріне де назар аударылды. Мәселен, 179 елді мекенді ауызсумен қамтамасыз ететін 135 су құбыры облыстың Санитарлық-эпидемиологиялық бақылау департаментіне қарайды. Бұл – 75,4 пайыздық көрсеткіш.
Отырыс барысында облыс әкімі басқармалар мен департаменттердің басшыларына тиісті тапсырмалар берді. Сондай-ақ қарастырылған барлық мәселелерді мұқият бақылаудың маңыздылығын атап өтті.
Қытай делегациясы өңірдің туристік әлеуетімен танысты
Абай облысы туралы сөз еткенде оның экономикалық қуаты агросектордан бастау алып, туризмдегі потенциалына жалғасатынына назар аудармай кетуге болмайды. Оның бір дәлелі – осы аптада өңірге Қытай делегациясы келіп, оның туристік әлеуетімен та нысқаны. ҚХР ШҰАА делегациясы Абай облысына сапары аясында өңірдің туристік әлеуетімен, Аягөз–Тачэн үшінші теміржол желісінің құрылыс барысымен танысты. Күн тәртібінде Бақты шекара бекетінде инфрақұрылымын салу және жүк кедендік ресімдеу жөніндегі жоспарларды үйлестіру және тағы да басқа мәселелер қаралды.
Қытайлық тарап сапар аясында облыс әкімінің орынбасары Димитрий Гариковпен кездесті. Кездесу барысында екі ел арасындағы жолаушылар қатынасын жандандыру, шекара бекеттерінде өткізу мүмкіндігін жоспарлау, өзара іс-қимыл тетіктері, трансшекаралық өнеркәсіптік ынтымақтастық, логистика мәселелері талқыланды.
Естеріңізде болса, 2023 жылдың 20 желтоқсанында Абай облысында «Бір белдеу, бір жол» тұжырымдамасы аясында ұзындығы 272 шақырым болатын жаңа Бақты–Аягөз теміржол желісінің құрылысы басталған болатын. Облыс әкімдігі Бақты құрғақ портын салуды қоса алғанда, мемлекет мұқтажы үшін жер учаскелерін резервке алу жұмыстарын жүргізді. Қазіргі уақытта жобалау-сметалық құжаттаманы әзірлеу шеңберінде техникалық-экономикалық негіздемеге түзету енгізілуде. Жоба 2027 жылға дейін аяқталады деп күтілуде.
Делегация өкілдері майлы дақылдарды, тазартылған май мен басқа да өнімдерді өндіріп, экспорттайтын Qazaq Astyq зауытына, сондай-ақ ірі қара мал өсірумен, көкөністерді өндірумен, өңдеумен және сақтаумен айналысатын «АГРОФИРМА «Приречное» ЖШС-ға барып, олардың жұмысымен танысты.
Н.Қосай