Спортшылардың алды Парижге табан тіреп, апта соңына таман ашылатын дүниежүзілік додаға дайындыққа кірісті. Олардың арасында Алматы облысынан шыққан үздік бестік: балуан Демеу Жадыраев, мергендер Әсем Орынбай, Эдуард Ещенко, Мария Дмитриенко, Никита Чирюкин бар. Францияға аттанар алдында олимпиадашылармен жолыққан Алматы облысының әкімі Марат Сұлтанғазиев спортшыларға ел намысын қолдан бермеуді тапсырып, сәттілік тіледі. Облыс басшысы бірінші кезекте олимпиадалық дайындық базасындағы спорт ғимараттардың бірі – Атыс кешенін аралап, мергендерді төрт жылда бір өтетін басты жарысқа жан-жақты дайындау үшін барлық қажетті жағдай жасалғанына көз жеткізді.
Кездесу олимпиадашыларды бейнебайланыс арқылы құттықтаған Қазақстан спорттық атыс федерацисының президенті Берік Асыловтың құттықтау сөзімен басталды.
«Барлық спортшы мен жаттықтырушыға осы олимпиадалық дайындық кезеңінен абыроймен өткені үшін алғыс айтқым келеді. Қазақстан олимпиадалық құрамасындағы 80 адамның тоғызы спорттық атудан сайысқа түседі. Олардың төртеуі Алматы облысынан. Еліміздің олимпиадалық құрамасынан лайықты орын алғандарыңызды мақтан тұтамын. Сіздерге үміт артамыз, табысты өнер көрсетулеріңізді тілейміз және жаттықтырушыларға әлемдік деңгейдегі шеберлерді даярлау үшін жылдар бойы атқарған қажырлы еңбектері үшін ризашылық білдіреміз. Сіздердің еліміздің намысын қорғап, жеңіспен оралатындықтарыңызға сенімдімін!» – деді Берік Асылов.
Облыс басшысы да олимпиадашыларға Париждегі XXXIII жазғы Олимпиада ойындарында Қазақстанның абыройына көлеңке түсірмеуге тілектестігін жеткізді.
«Олимпиада ойындары – әлемдік спорт тарихында ерекше орын алатын оқиға. Ойындардағы әрбір жеңіс пен жүлде кез келген жарыстардағы жетістіктерден жоғары тұрады. Олимпиада жекелеген спортшылардың, тұтас мемлекеттердің өзара теңдігі мен құрметінің және адал бәсекелестігінің жарқын көрінісі. Сіздердің алдарыңызда бүкіл әлемге Қазақстан спортының әлеуетін кезекті рет паш ету міндеті тұр. Олимпиада – ең таңдаулы спортшылар бағындыратын биік шың. Сондықтан Парижде намыс пен жігердің, төзімділік пен шеберліктің керемет үлгілерін көресетесіздер деп үміттінеміз», – деп атап өтті Марат Сұлтанғазиев.
Олмпиада лицензиясын жеңіп алып, алдағы күндерде өтетін ең үлкен сынаққа тас-түйін дайындықта жүрген спортшылар мен жаттықтырушылар облыс әкіміне жан-жақты қолдау көрсеткені үшін алғыс білдірді.
«Өңірімізде спорттың дамуы, әсіресе оның әлемдік деңгейге көтерілуі – облыс басшылығының жан-жақты қолдауы мен қамқорлығының нәтижесі. Жаттығулар өткізіп, түрлі оқу-жаттығу жиындары мен жарыстарға басқа қалалар мен елдерге шығу үшін барлық қажетті жағдай жасағаны үшін алғыс айтамын. Қазір бар ойымыз Олимпиада да қалайда жеңіске жетіп, еліміздің абыройын асқақтатуды мақсат етіп отырмыз», – деді стендтік атудан халықаралық дәрежедегі спорт шебері Әсем Орынбай.
Париж Олимпиадасына қатысуға лицензия алған спортшыларға өңір басшысы атынан 1 500 000 теңге көлемінде ақшалай сертификаттар табысталды.
Алматы облысы,
Болат Абаған