Көлік министрлігі Қазақстан жолдарында автобустар мен жүк көлігі жүргізушілерінің жолаушыларды, багажды немесе жүкті тасымалдау кезінде еңбек және демалыс режимін сақтауын бақылау бойынша ауқымды акция өткізуде. 9 қыркүйекте басталған акция 9 қазанға дейін жалғасады, – деп хабарлайды Aikyn.kz ведомствоның баспасөз қызметіне сілтеме жасап.
Көлікті басқарудың күнделікті ұзақтығы қолданыстағы қағидаға сәйкес 9 сағаттан аспау керек. Төрт жарым сағат бойы үздіксіз басқарғаннан кейін, жүргізуші кемінде 45 минут үзіліс жасауға тиіс.
Акция басталғалы Автомобиль көлігі және көліктік бақылау комитетінің қызметкерлері жалпы сомасы 4 миллион теңгеден астам әкімшілік құқықбұзушылық туралы 218 хаттама толтырды.
«Акция еліміздің барлық өңірінде өтіп жатыр. Тахограф – жүргізушінің еңбек және демалыс режимін, қозғалыс жылдамдығын, жүріп өткен жолын үздіксіз тіркейтін сандық құрылғы. Бұл құрылғы жол қозғалысы қауіпсіздігін қамтамасыз етуге мүмкіндік береді. Қалааралық және халықаралық тасымал барысында болатын жол-көлік оқиғаларының басты себептерінің бірі – жүргізушінің режимді сақтамай, шаршауы немесе рұқсат етілген қозғалыс жылдамдығын асыруы.
Акция автожолдардағы жол-көлік оқиғаларының санын азайтуға, жолаушыларды, багажды және жүктерді тасымалдау барысында қауіпсіздікті қамтамасыз етуге, сондай-ақ автокөлік құралдары жүргізушілерінің еңбек және демалыс режимін сақтамауын анықтау және алдын алуға бағытталған», – деді комитеттің бас сарапшысы Күнайым Кәмиева.
Жалпы, бұл жұмыс тұрақты жүргізіледі. Жыл басынан бері 2 700-ден астам ауыр жүк көлігі мен автобус жүргізушілері еңбек және демалыс режимін бұзған. Көліктік бақылау инспекциясының қызметкерлері олармен түсіндірме жұмыстарын жүргізіп, хаттама толтырды. Айыппұлдың жалпы сомасы 48 млн теңгеден асты.
Тахографтармен жабдықтауға автобустар, жүк көліктері, оның ішінде:
- қауіпті жүктерді автомобильмен тасымалдауды;
- жолаушыларды, багажды және жүктерді автомобильмен халықаралық тасымалдауды;
- жолаушыларды және багажды автомобильмен облысаралық, қалааралық тұрақты тасымалдауды;
- жолаушыларды және багажды автомобильмен облысаралық, қалааралық, ауданаралық тұрақты емес тасымалдауды жүзеге асыру кезінде пайдаланылатын көліктер жатады.
Қағида талаптары сақталмаған жағдайда «Әкімшілік құқық бұзушылық туралы» ҚР кодексінің 572-бабымен тасымалдаушыларға 10 АЕК-тен 50 АЕК (36 920 - 184 600 тг) аралығында, жүргізушілерге 10 АЕК (36 920 тг) көлемінде әкімшілік айыппұл көзделген.