Боксшы Данияр Елеусінов демеушілері туралы айтып берді, – деп хабарлайды Aikyn.kz.
Спортшы Ulysmedia YouTube арнасына берген сұхбатында демеушілері қатарында кәсіпкер Айдын Жұмаділұлы мен Кеңес Рақышев бар екенін атап өтті. Боксшының айтуынша, басында қомақты қаржы берген – Данияр Абулғазин.
"IBF Intercontinental нұсқасы бойынша Джулиус Индонгоны жеңіп келген едім. Ол кісі қатты қуанды. Себебі енді ол Данияр әуесқой бокста жақсы еді, кәсіпқой бокста жолы болмайды, құлата алмайды, соққысы жоқ деген әңгімелерді естиді ғой. Индонго Кроуфордпен бокстасып ұтылды, алайда төрт белдіктің екеуі Кроуфордта, екеуі Индонгода қалған. Джулиус Индонго бұрынғы әлем чемпионы болғандықтан, мен үшін атағы бар спортшы болды. Кездесуде екінші раундта нокаутқа жіберген кезінде сол ағамыз да қуанды", – дейді спортшы.
Данияр Елеусінов қазір үлкен көмек қажет екенін жасырмады.
"Масштабный деген бала-шағама, күнделікті өміріме ғана емес, мен дегеніме жеткім келіп тұр ғой. Мықты қарсыласпен шығуым керек. Оның бәрі қомақты қаржы. Шоу өткізу керек. Промоутер болмаса, неге өз елімізде өткізбейміз? Біздің халық сенбейді, білемін, қазір анау мешоктарды алып келеді де, ұрады деп. Жарайды, мешокты алып келмейін, келісетін, аты бар спортшыны алып келейін. Бірақ тиісінше, ол өзінің тәуекелі үшін сондай қаржы сұрайды. Екі есе сұрайды, Қазақстанға келу үшін. Ол Америкада, Мексикада төбелесе беруі мүмкін, Қазақстанға келуге келісім бере ме, бермей ме, белгісіз", – деді Данияр Елеусінов.
Сараптама, зерттеу мақала, күнделікті өзекті ақпаратты «Айқынның» Telegram арнасынан таба аласыз.