БАҚ беттерінде жас боксшы Мұхаммедсабыр Базарбайұлы Таиландта өтетін кәсіпқой бокс кешінде өнер көрсетеді деген ақпарат тараған. Дегенмен былғары қолғап шебері бұл мағлұматты жоққа шығарып отыр, – деп хабарлайды Aikyn.kz 1bol.kz-ке сілтеме жасап.
Ол ұсыныс болғанын, бірақ өзі бас тартқанын тілге тиек етті.
«БАҚ беттерінде менің кәсіпқой бокс кешінде өнер көрсететінім туралы ақпарат тарады, бірақ бұл жалған. Нақтырағы, ұсыныс түскені рас, алайда өзім бас тарттым. Бір жекпе-жек деп айтылды, сөйте тұра дайындалатын уақыт тым аз. Оның үстіне, болашағымды әзірге әуесқой бокспен ғана байланыстырғым келеді. Алда жарыстар бар, бар назарды соларға аударып, тыңғылықты даярлық жасау қажет. Бала кезімнен келе жатқан армандарымды орындасам деймін. Жоспар көп, соларды жүзеге асырсақ деген ниетіміз бар», – деді боксшы.
Сараптама, зерттеу мақала, күнделікті өзекті ақпаратты «Айқынның» Telegram арнасынан таба аласыз.