Халықпен кері байланыстың ұтымды арнасы

Сайлаушылармен тікелей жұмыс істеуге басымдық беріп отырған партиямыз, халықтың үніне құлақ асып, қоғамдастық білдірген талаптарды бұлжытпай іске асыратын ықпалды саяси күшке айналды. «AMANAT» – қоғамда әлеуметтік әділеттілік принциптерін орнататын, барлық азаматтарға тең мүмкіндіктер жасауды жақтайтын, қоғам мен мемлекет игілігі үшін жұмыс істейтін партия ретінде ширап, елімізде жаңа саяси мәдениетті қалыптастырып келеді.

Азаматтардың партияға де­ген сенімін ны­ғайтып отыр­ған құрылымдар арасында «Үз­дік қоғамдық қабылдау бөлмесі» байқауы жарияланды. Атап өтуіміз керек, партияның Түр­кіс­тан облыстық филиалы аза­маттардың арыз-шағымын тіркеу, оларды бақылауға алу, сұраныстардың оң шешім та­буы­на жәрдем көрсету сала­лар­ында республикада көш бас­тап тұрған өңірлік құрылым саналады. Облыстық партия филиалына қа­расты қоғамдық қабылдау бөлмелерімен 2024 жылы 18 мыңға жуық азамат­тың сұра­ныс­тары бақылауға ал­ын­ды. Тіркеуге алын­ған ар­ыз-өтініштердің 64 пайызы пар­тия ықпалымен оң шешіл­ді. Яғни, 11,5 мыңнан астам аза­маттың талап-тілектерінің орын­далуына үлесімізді қос­ып, мемлекет пен азаматтар ара­сында сындарлы байланыс орнығуына себепші болдық. Сондай-ақ өткен жылы 6,5 мы­ңға жуық азаматтың өтініш­тері бойынша кәсіби құқықтық кеңестер беріліп, көтерілген сауалдарды құқықтық механ­изм­дер арқылы шешуде пай­далы консультациялар ұсын­ыл­ды.

Қоғамдық қабылдау бөлме­лерінің алаң­дарында облыс әкімінің орынбасар­лары, деп­артамент, басқарма басшы­лары, халыққа қызмет көрсету­ші ұйымдардың жет­екші­лері, мәслихат депутаттары тұрақты түрде тоқсанына кемі бір мәрте азаматтарды жеке мәселелері бойынша қабылдаулар жүр­гізу­де. Ашық қоғам құруда тұрғындар көтерген сауалдарға жауаптар беріліп, мемлекеттік шешімдер қабылдау құзыреті­не ие атқарушы органдар хал­ық­ты толған­дыр­ған өзекті мә­­селелердің оңтайлы ше­шім­дер табуына үлестерін қосуда.

Облыс, аудан орталық­тары­нан шалғай­да жатқан елді мекендер халқының сұран­ыс­тарын да айрықша назарымыз­да ұстап отырмыз. Осы орайда шалғайда орналасқан елді ме­кендерде мобильді көшпелі қоғам­дық қабылдаулар жиын­дар­ын өткізіп, жергілікті тұр­ғын­дардың өздері көтеріп жат­қан мәсе­лелері бойынша облыс орта­лы­ғы – Түр­кіс­тан қаласына сабылмай, ауылға келген жауапты тұлғаларға базы­наларын жеткізуге мүм­кін­дік­тер жасалды. Облыстық партия филиалының бастама­сымен ай сайын екі ауданның 4 елді мекен­інде өтетін кез­десулер партияның «Құқық­тық көмек» жобасы ая­сында ұйым­дастыр­ылып, тұрғын­дардың өтініштерін тың­дауда прокура­тураның, полицияның, сы­бай­лас жемқор­лыққа қар­сы іс-қимыл, әділет, төтенше жағ­дай­лар ор­ган­дарының, жеке сот орындаушылар, адвокаттар алқа­сының, нотариалдық па­ла­та өкілдерінің, медиатор­лардың қатысуы қамтамасыз етілуде. Жергілікті маңызға ие мәселелерді облыс­тық деңгей­дегі басқар­малар мен депар­таменттердің жауапты өкіл­дері, халыққа қызмет көр­-сету­ші ұйымдар­дың жетек­шілері, халықты ауызсумен, газбен, электр қуатымен, ағын сумен қамту­шы мекеме­лердің жауапты өкілдері, автомо­биль жолдарының сапасына жа­уапты құры­лым жетекшілері, облыстық және аудандық деп­ут­аттық корпустардың өкілдері келіп, тыңдау үрдісі қалыптас­қан. Бұл кездесулерде көптеген мәселелер жүйелі шешімдерін табуда, өзекті деген мәселе­лердің құқықтық реттеу тетік­тері айқындалып, мемлекеттік органдардың да, партиялық қызметтің де бақылауына алынуда.

Партияның өңірлік фили­ал­ының қо­ғам­дық қабылдау бөлмесі атқарып жатқан ау­қымды жұмыстың легін осы санаттағы мін­деттер құрайды. 18 мыңға жуық арыз-өтінішті тіркеуге алып, арнайы дерек­қорға енгізу, әрбір мәселені мазмұнына қарай жіктеп, жау­апты органдарға жолдау табан­ды­лықты талап ететін жұмыс екені белгілі. Өтініш­тердің орындалуы туралы ақпарат­тарды алып, бірыңғай электр­онды базаға енгізу, өтініш иелерімен кері байла­ныс ор­нату, жауаптардың бері­луін қа­дағалау мәселесі де аса ұқып­тылықты, үлкен жауап­кер­­ші­лікті талап ететін жұмыс. Пар­тия алаңында өтетін қо­ғамдық қабылдау­лар­ды мер­зім­інде, бекітілген кесте бой­ынша өту­ін ұйымдастыру, мобильді көш­­пелі қоғам­дық қабылдау­лар жиындар­ын өт­кізу, олар­ға барлық сала бо­йын­ша жауапты өкілдер­дің қатысуын ұйымдас­тыру ісінің де өз қиындығы бар. Жауап­кер­шілік ауқымы кең бұл мін­деттерді облыс­тық партия филиа­лын­да екі адам ғана атқарып отыр. Олар – қо­ғам­дық қабылдау бөлмесінің мең­герушісі Манат Жадақова мен осы бөлімнің консуль­т­анты Жанар Бауыржанқызы.

Партиялық қызметтің бе­делі болып табылатын қоғам­дық қабылдау бөлмелері­нің жұмысын ынталандыруда «AMANAT» партиясы Респуб­ли­калық қоғамдық қа­был­­дау бөлмесінің бастамасымен «Үз­дік қоғам­дық қабылдау бөлме­сі» республика­лық байқауына облыстық деңгедейгі іріктеу кезең­ін өткіздік. Іріктеу бай­қауы­на 17 аудан, қалалық пар­тия филиалы жан­ындағы қо­ғам­дық қабылдау бөлмелері қа­тысып, олар­дың үздік жұмыс тәжірибе­лер­ін бағалауда ар­найы комиссия құрдық. Бай­қау шарты бойынша қоғамдық қабыл­дау бөлмелерінің жұмыс тәжірибелерін азаматтардың өтініш­т­ерімен жұмыс, оң ше­шілген өтініштердің үлесі, DOCUMENTOLOG бірыңғай ақ­параттық жүйесіне дерек­терді енгізу, қабыл­дау бөлме­лерінің жұмысы, азаматтардың жеке қабылдаулар­ын ұйым­дастыру, «Құ­қықтық көмек» жоба­сын іске асыру, аймақ­тың өзекті мәселелер­ін тізбектеу, қо­ғамдық қабылдау­лар жұ­мыс­­ын БАҚ-та ілгерілету ба­ғыттары бойынша зерделеп, бағаладық.

Байқау жеңімпаздарын бү­гін партияның өңірлік филиа­лында өткен кеңейтілген ап­пар­аттық мәжіліс барысында марапатта­дық. Комиссияның шешімімен «Үздік қоғамдық қабылдау бөл­месі» байқауына қатысып, бел­сен­ділік таныт­қан­дары үшін Сарыағаш, Түл­кібас, Сауран, Төлеби аудан­дық және Арыс, Түркістан қа­­­лалық партия филиалдары алғысхат пен сый­лықтарға ие болды. Байқау­дың ІІІ орын иегері ретінде партия­ның Ор­да­басы аудандық фи­лиа­лы анықталса, ІІ орынға пар­тия­ның Қазығұрт аудандық фи­лиа­лы лайықты деп таныл­ды. Түркістан облысының «Үз­дік қоғамдық қабылдау бөл­месі» байқауының жеңім­пазы ретін­де Сайрам аудандық партия филиалы танылып, ол респуб­ли­калық деңгейдегі байқауда бақ сынайтын бола­ды. Еңбегі жан­ған әріп­тес­терімізді құт­тық­таймыз, рес­пу­б­ликалық дең­гейдегі бай­­қау­да үздік шы­ғу­ына тілек­тестігімізді білдіреміз!

 Алтынсары ҮМБЕТӘЛИЕВ, 

«AMANAT» партиясы Түркістан облыстық

филиалының төрағасы, облыстық мәслихаттағы

партиялық  фракция жетекшісі