Ресми шара барысында Хусейн Аль Мусаллам қаңтар айында Астанаға жасаған сапары кезінде көрсетілген қонақжайлылық үшін Қазақстан тарапына алғыс білдірді. Харбиндегі қысқы Азия ойындарының ұйымдастырылу деңгейіне тоқтала отырып, ол 2011 жылғы Азия ойындарын өткізудегі Қазақстанның тәжірибесін ерекше атап өтті және еліміздің ірі халықаралық жарыстарды қабылдауға әлеуеті жоғары екенін айтты.
Қазақстан ҰОК президенті Геннадий Головкин Хусейн Аль Мусалламға көрсетілген сенім мен Қазақстанға жасаған сапары үшін алғыс білдіріп, кездесудің нәтижелі өткенін атап өтті.
«Біздің қызметіміздің басты бағыты – халықаралық ұйымдармен ынтымақтастықты нығайту. Азия Олимпиадалық кеңесін біз стратегиялық маңызды серіктес ретінде қарастырамыз, бұл ұйыммен бізде олимпиадалық спортты Азия құрлығында дамыту бойынша ортақ мақсаттар мен көзқарастар бар. Алда үлкен бірлескен жұмыс күтіп тұр», – деді Қазақстан ҰОК басшысы.
Кездесу соңында Хусейн Аль Мусаллам Қазақстан өкілдерін 11 шілде мен 13 тамыз аралығында Сингапурда өтетін су спортынан әлем чемпионатына құрметті қонақ ретінде шақырды.
Сонымен қатар Қытай Халық Республикасының (ҚХР) Бас мемлекеттік дене шынықтыру және спорт басқармасының министрі, Қытай Олимпиадалық комитетінің президенті және Халықаралық ушу федерациясының басшысы Гао Чжиданмен кездесу өтті.
Кездесу Харбин-2025 қысқы Азия ойындарын ұйымдастыру комитетінің ресми қабылдауы аясында өтті.
Тараптар екі ел арасындағы спортты дамыту саласындағы ынтымақтастық үшін өзара алғыс білдіріп, оны одан әрі нығайтуға ниетті екенін мәлімдеді.
Қазақстандық делегация Қытай өкілдеріне қонақжайлылық үшін ризашылығын білдіріп, ашылу рәсіміне шақырғаны және Азия ойындарын жоғары деңгейде ұйымдастырғаны үшін алғыс айтты.
«Мұндай ауқымды кешенді жарыстарды өткізу әрдайым үлкен жауапкершілікті талап етеді. Харбин-2025 қысқы Азия ойындарының ұйымдастырушыларына қонақжайлылығы мен үйлесімді жұмысы үшін алғысымызды білдіреміз. Біз ойындардың басынан бері осындамыз және ұйымдастыру комитетінің өз міндеттерін үлкен жауапкершілікпен орындап жатқанын көріп отырмыз. Мұны логистикалық қамтамасыз етуден бастап, техникалық қолдау деңгейі мен еріктілердің үйлесімді әрекеттерінен анық байқауға болады», – деді Геннадий Головкин.
Әсет ҚАЛИ