Елдің 17 өңірінде «Әкімдер мектебі» жобасы аясында 2 400-ден астам ауылдық округ және аудан әкімдерін кешенді оқыту басталды.
Экономикалық даму бағдарламасы әзірленеді
778
оқылды

Оқытудың басталу рәсіміне Премьер-Министрдің орынбасары Қанат Бозымбаев, «AMANAT» партиясының Атқарушы хатшысы Дәулет Кәрібек,  Мемлекеттік қызмет істері агенттігінің төрағасы Дархан Жазықбай,  Президент жанындағы Мемлекеттік басқару академиясының ректоры Ерлан Әбіл және басқа да тұлғалар қатысты.  

«Әкімдер мектебі» жобасы ауылдық округ әкімдерінің біліктілігін арттыруға бағытталған. Олардың басым бөлігі – тіке­лей сайлау нәтижесінде алғаш рет мемлекет­тік қызметке келгендер. Әкімдердің сайла­нуы – Президент бастамашы болған саяси жаңғырудың маңызды кезеңі және Әділетті Қазақстан құрудың негізгі тетігі. Бұл реформа азаматтардың саяси үдерістерге белсенді қатысуына жол ашты, алайда жаңа сайланған әкімдердің басым бөлігі – мұғалімдер, дәрігерлер, аграршылар мен кәсіпкерлер мемлекеттік басқарудағы тәжірибенің жетіспеушілігін сезінуде.  

Премьер-Министрдің орынбасары Қанат Бозымбаевтың айтуынша, «Әкімдер мектебінің» іске қосылуы – уақытылы және орынды шешім. Біліктілікті арттыру бағдарламасы ауылдық өңірлердің дамуына жаңа серпін беріп, халықтың өмір сүру деңгейін жақсартуға мүмкіндік береді. 

«AMANAT» партиясының Атқарушы хатшысы Дәулет Кәрібектің сөзінше, «Әкім­дер мектебі» жобасы Мемлекет бас­шысының тікелей тапсырмасымен жү­зеге асырылып жатыр және Президенттің саяси реформалары аясында жергілікті басқаруды жетілдіруге бағытталған маңызды шара­лар­дың бірі. Атқарушы хатшының айтуынша, жоба барысында ауыл әкімдері өз елді мекендерінің экономикалық дамуы бойынша бағдарламалар әзірлеуге тиіс. Бұл бағытта Саяси ме­неджмент академиясы Мемлекеттік басқару академия­сымен бірлесіп, арнайы оқыту бағдарламасын жасады.

Президент Қасым-Жомарт Тоқаев жа­қында өткен Үкіметтің кеңейтілген отыры­сында «AMANAT» пар­тия­сының оң тәжі­рибесіне назар аударды. Бұл кез­дейсоқ емес, өйткені партия ауыл әкімдерімен жұмыста айтарлықтай тәжірибеге ие. Был­тыр еліміздің барлық өңірінде жаңадан сайланған әкімдердің алғашқы қызметтік нәтижелері талқыланған форумдар ұйым­дастырылып, олардың өкілеттіктерін ке­ңей­ту, соның ішінде ауылдық округтер бюд­жеттерін ұлғайту бойынша ұсыныстар жасалды. Сонымен қатар «AMANAT» пар­тия­сының Саяси менеджмент академиясы ауылдық округ әкімдерін оқыту жұмыстарын жүргізген болатын. 2022 жылы «Ауыл ама­наты» жобасы аясында 2 300-ден астам әкім мен партияның аумақтық филиалда­ры­ның атқарушы хатшыларына кешенді оқыту ұйымдастырылды. Бұл бағдарлама халықтың эко­номикалық белсенділігін арттыру және табысын көбейту бойынша басшылардың құзыреттілігін арттыруға арналған көшпелі семинарларды қамтыды.  Енді жинақталған тәжірибе негізінде «AMANAT» партиясының Саяси менеджмент академиясы мен Президент жанындағы Мемлекеттік басқару академиясының сарапшылары арнайы «Әкімдер мектебі» білім беру бағдарламасын әзірледі.  

Мемлекеттік қызмет істері агенттігінің төрағасы Дархан Жазықбай атап өткендей, ауыл әкімдерін сайлау кезінде саяси партиялар ұсынатын кандидат­тардың кәсіби жауапкершілігі мен дайындығына ерек­ше назар аударуы қажет.

Оқу 17 ақпаннан 13 мамырға дейін жал­ғасады және Мемлекеттік басқару академиясының өңірлік филиалдарында өтеді. Оқу курсы 240 сағаттық дәрістерден тұрады, оның 140 сағаты заңнама және мемлекеттік басқару мәселелеріне, ал 100 сағаты ауылдық аумақтардың экономикалық дамуына арналған. Негізгі бағыт практикалық дағдыларға қойылады: маркетингтік зерт­теулер, жеке қосалқы шаруашылықтардың (ЖҚШ) тауарлық массасын анықтау, кооперативтер құру, ауыл шаруашылығы өнімдерін қайта өңдеу және өткізу. Оқуды аяқтағаннан кейін барлық әкім өзінің экономикалық даму бағдарламаларын ұсынады, ал Үкіметтің Өңірлік саясат жөніндегі жобалық кеңсесі мен «AMANAT» партиясы олардың іске асырылуына әдістемелік және практикалық қолдау көрсетеді.  

Еске сала кетейік, бұған дейін «AMANAT» партиясының жанынан Үкіметтің Өңірлік саясат жөніндегі жобалық кеңсесінің Ана­литикалық орталығы ашылған болатын. Ол «Әкімдер мектебі» жобасын жүзеге асы­румен, басқару процестерін цифрлан­дырумен, сондай-ақ аудан және ауыл әкім­­дерін экономикалық даму бағдар­ла­маларын іске асыру барысында сүйемел­деумен айналысады.

Ә.САМАТҰЛЫ