Қызыл жалынның өршуіне көбіне газ бен электр жабдықтары, жылыту құралдары себеп болады. Бүгінде бұл мәселені шешуге негізделген қауіпсіздік іс-шаралары мен жобалар бар. Солардың бірі – алматылық студенттер Arduino технологиясымен әзірлеген «Ақылды үй» инновациялық жобасы. Аталған жоба тұрғын үй жайлылығы мен қауіпсіздігін қамтамасыз етуге бағытталған.
Жоба авторларының бірі Алматы құрылыс-техникалық колледжінің 2-курс студенті Ғаббас Баязитов қазір «Жиһаз өндірісі» мамандығы бойынша білім алады. Ғаббастың сөзінше, автоматтандыру жүйесінде шамның жанып-сөнуін реттейтін интеллектуалды жарық сенсорлары қарастырылған. Сондай-ақ мұнда газ және түтін, температураны өлшейтін және ылғалдық сенсорлары, PIR-датчиктері бар. Газ және түтін сенсорлары ықтимал төтенше жағдайларды алдын алуға көмектессе, температураны өлшейтін және ылғалдық сенсорлары жайлы микроклиматты қамтамасыз етуге, желдету мен жылыту жүйесінің жұмысын автоматты түрде реттеуге ықпал етеді.
– Инновациялық жобаны жасау идеясы тұрмыстағы қауіпсіздік пен жайлылықты арттыру қажеттілігінен туындады. Жобамыздың басты мақсаты – тұрғын үйдегі процестерді автоматтандыру және ресурстарды үнемдеу. Онымен қоса, жоба қауіпсіздік, энергияны үнемдеу, қашықтан басқару және апаттық жағдайларды бақылау сынды өзекті міндеттерді шешуге арналған. Біз процесс барысында қозғалыс, ылғалдылық, реле, контроллер, жарық және температура датчиктерін қолдандық. Жүйе жарықты басқарады, микроклиматты бақылайды, хабарламалар жібереді, құрылғыларды қашықтан басқаруға мүмкіндік береді және бейнемониторинг жүргізеді, – деді Ғаббас Фархадұлы.
Жоба авторлары «Ақылды үйді» әзірлеу барысында бағдарламау тілінің Морзе әліппесін пайдаланған. «Ақылды үйдің» барлық функциясын Wi-Fi мен Bluetooth арқылы смартфоннан қашықтан басқаруға мүмкіндік бар. Дәлірек айтсақ, тұрғын үйге қауіп төнген жағдайда жүйе хабарлама жіберсе, зуммерлер мен LCD-дисплейлер қауіп туралы ескертеді. «Ақылды үйді» басқаруға арналған қосымшаны Play Market немесе App Store қосымшасынан жүктеп алуға болады. Ғаббас алдағы уақытта жобаға жасанды интеллект технологияларын енгізу жоспарда бар екенін айтты. Тағы бір атап өтетін маңызды жайт, егер келешекте инвесторлардан қолдау болса, авторлар инновациялық жобаны әрі қарай дамытып, нарыққа шығаруға дайын екенін жеткізді.
– Иә, жүйе интернетке қосылады және мобильді қосымша мен дауыстық көмекшілер арқылы басқаруға болады. Құрамдас бөліктерді интеграциялау және кодты оңтайландыру кезінде қиындықтар кездесті. Біз алдағы уақытта пайдаланушылардың әдеттеріне бейімделу үшін жасанды интеллект енгізуді, ақылды қалалармен интеграцияны және автономды режимді пайдалануды жоспарлап отырмыз. Инвесторлардың қолдауымен жобаны жүзеге асыруға және оның мүмкіндіктерінің ауқымын кеңейтуге дайынбыз, – деді жоба авторы Ғ.Баязитов.
Жоба тұрғын үйлердегі қауіпсіздік мәселесін шешуге, жайлы орта құруға жол ашады. Одан өзге, инновациялық жоба өзекті тақырыптарды шешуге ықпал етіп қана қоймай, студенттердің заманауи технологиялармен жұмыс істеуге қызығушылығын арттырып, IT саласында тәжірибесін жетілдіруге мүмкіндік береді.
Алтынай БАУЫРЖАНҚЫЗЫ,
Алматы қаласы