Отандық WT таэквондо федерациясының президенті Құдырет Шәмиев Қазақстан таэквондодан 2027 жылғы әлем чемпионатын қабылдауға мүдделі екенін айтты. Бұл туралы ол ұлттық құраманың бірлескен жиынында мәлімдеді.
«2014 жылдан бері Қазақстанда таэквондодан әлемдік жарыстар өтпеген. Бірінші кезекте, бұл біздің оқшауланып қалғанымызды білдіреді. Спорт бар жерде саясат та бар. Сол саясат шеңберінен тым алыста жүрмегеніміз дұрыс. Сондықтан біз өз елімізде World Taekwondo аясында өткізілетін ірі жарыстарды қабылдауға толық дайынбыз», – деді Құдырет Шәмиев.
Айтуынша, Kazakhstan Open турнирін жоғары дәрежеде тамыз айында өткізу жоспарланған. Бұл бәсекеге әлемдік таэквондодағы беделді тұлғалар мен чемпиондар шақырылады.
«2026 жылы таэквондодан Гран-при турнирін, ал 2027 жылы таэквондодан әлем чемпионатын өткізуге үміткер атанбақпыз. Қазіргі таңда біз осы жарыстарға қатысты құжаттарды түгел дайындап, әлемдік ұйымға жібердік. Елімізде таэквондоға деген қызығушылықтың жоғары екенін өзіміз көрсетпесек, әлемдік ұйымнан бізге деген көзқарасты сұрап алу қиын. Олармен байланыста болып, әртүрлі келіп жатқан өзгерістер, жаңашылдықтар, бағдарламалардан хабардар болуымыз керек», – деді Құдырет Шәмиев.
Айта кетелік, таэквондодан Қазақстан құрамасы бұл күндері Алматы облысында Қытайдың Синцзянь аймағынан келген оқу-жаттығу жиындарын аяқтауға дайын. Қазір Есбол Сұлтановтың шәкірттері Болгарияда өтетін халықаралық турнирге дайындалып жатыр.