Кезінде Атырау облысы әкімінің орынбасары лауазымында болған экс депутат Ғұмар Дүйсембаевтың айтуынша, Атырауда фармацевтикалық зауыт тұрғызу үшін қомақты қаражат қаралған.
«Қаржының 49 пайызын «Атырау» әлеуметтік-кәсіпкерлік корпорациясы бөлді. Корпорация арқылы 800 млн теңге көлеміндегі қаражат зауытқа құрал-жабдық алу үшін бөлінген еді. Компания корпорация арқылы бөлінген қаражатты құрал-жабдыққа емес, құрылыс саласына жұмсап жіберген. Қаражат мақсатты жұмсалмағаны себепті оны қайтару мәселесі көтерілді. Осылайша, жоба тоқтап қалды. Қазір зауытта инфрақұрылыммен мәселе жоқ. Жол бар, газ тартылып тұр. Алдағы уақытта зауыттың тағдырына байланысты оң қозғау болады деп сенемін. Қалай десек те, фармацевтикалық зауытқа елімізде қажеттілік бар. Себебі Қазақстанда дәрі-дәрмек шығарып жатқан үлкен зауыт жоқ. Алматыда, Шымкентте цех деңгейіндегі өндіріс қана бар. Бұл еліміздің қажеттілігі үшін жеткіліксіз», – дейді Ғұмар Дүйсембаев.
Айтса айтқандай, Атырауда фармацевтикалық өнімдер шығаруы жоспарланған LUMPAN CASPIAN PHARMACEUTICALS LLP зауыты құрылысы 3 млрд 700 млн теңгеге бағаланған болатын. Сол кезде облыс әкімі болып тұрған Бақтықожа Ізмұхамбетов басшылық зауыттың іргетасы қаланған уақытта «уақыт капсуласын» салып, шетелдік медицина саласының мықты мамандарын шақыртып, шикізатын Үндістан мен Қытайдан алдыратын болып, уәде берген еді.
Жоспар бойынша зауыт құрылысы 2017 жылы аяқталуы тиіс болды. Бірақ «пәлен жерде алтын бар, барсам, бақыр да жоқ» дегеннің кері дәл осы зауыт болып тұр. Шыны керек, қыруар қаржы бөлінген ғимараттың қазір қарайтындай сиқы да қалмаған. Қабырғасы да қаланбаған зауыттың құрылыс алаңында он шақты тірек бағанасы ғана тұр.
«Атырау» әлеуметтік-кәсіпкерлік корпорациясының баспасөз хатшысы Гүлназ Кәрімжанның айтуынша, корпорация зауыт құрылысынан толықтай бас тартқан.
«Жаңа кәсіпорынның 30 пайызын кезінде «Атырау» әлеуметтік корпорациясы қаржыландырған еді. Кейіннен құрылысқа қатысты шикілік шығып, сот арқылы қаржы қайта өндірілді. Осылайша, 2018 жылы жобаның бастамашысы «Атырау» әлеуметтік-кәсіпкерлік корпорациясы 60 миллионнан астам қаржыны кері қайтарды. Алдағы уақытта «Атырау» ӘКК бұл жобаны қаржыландырмайды», – деді спикер.
Атырау облысы әкімі Серік Шапкенов «Атамекен бизнес» каналына осыдан үш жыл бұрын берген сұхбатында зауытты қолға алған атыраулық кәсіпкердің Үнді, Польша елдеріндегі серіктестерімен бірлесе отырып компанияны іске қосамын деген жоспары болғанын айтты. «Бұл жерде кәсіпкердің де қаражаты жұмсалды, жергілікті атқарушы органның да көмегі болды. Алайда жұмыс тұралап тұр. Оған серіктестер арасындағы өзара мәселелер, қаржы жетіспеушілігі секілді қиындықтар себеп болып отыр», – деген еді Серік Шәпкенов.
Біз осы мәселе бойынша соңғы мәліметтерді білмек болып, Атырау облысы әкімдігіне қайта хабарластық. Атырау облысы әкімінің баспасөз хатшысы Руслан Жұмағазиевтің айтуынша, жергілікті билік инвестор іздестіруде. Тіпті, алыс және жақын шетелден келетін бизнес және ресми құрылым өкілдеріне ақпарат жеткізіліп отыратын көрінеді. «Әзірге инвестор табылған жоқ» деді спикер. Орталық Азиядағы ең ірі зауыттардың бірі болуы тиіс бұл өндірістің нақты қашан іске қосылып, өнім шығаратыны белгісіз. Инвестор әне келеді, міне келеді деп жүргенімізде құрылыс нысаны мүлде пайдаға аспай қалмаса болғаны.
Айтпақшы, Атырауда тұралап тұрған құрылыс бір ғана бұл емес. Бұған дейін Концерттік зал салынуы тиіс болып, оның құрылысы 2012 жылдан бері тоқтап тұрған еді. Атышулы Бергей Рысқалиевтің кезінде теңдессіз зал ретінде жарнамаланған «Концерттік залдың» жартылай салынған құрылысы Атыраудың қақ ортасынан күні кеше ғана сүріліп тасталды. Ендігі жоспар бойынша ол жерге үлкен мәдени ошақ салынуы тиіс. Ал залдың құрылысына жұмсалған қыруар қаржы құмға сіңген судай жоқ болды да кетті. Әзірге желге ұшқан қаржының қайтарымын іздеп жатқан адам көрінбейді...
Баян ЖАНҰЗАҚ,
Атырау облысы