Әуелгісі судан алынатын арзан әрі тұрақты электр қуатына қол жеткізу болса, осы өңірдегі туризмді дамыту да негізгі ұстаным екені анық. Уақыт өте келе Қапшағай су электр стансасы еліміздің энергетикалық қауіпсіздігіне қалтқысыз қызмет ететін нысанға айналды. Ал жасанды теңіздің жағалауындағы туризмнің дамуына қатысты мақсат әлі де орындалмай отырғаны өкінішті...
Қапшағайды еліміздегі ең танымал демалыс орны деп тануға бола ма? Бұл тұрғыдан келгенде пікір екіге бөлінеді екен. Біріншіден, суы мөлдіреген көл жағалауы туризм үшін таптырмайтын мекен екені даусыз әрі Алматы сияқты алып мегаполистен таяқ тастам жерде жатқан жағажай демалыс іздеген адамды өзіне тартып тұратыны шын. Бұл – енді туризмді дамыту үшін қолайлы бағдар. Көл аңсаған көңілді жұрт Қапшағайға келіп аунап-қунап кетуді әдетіне әлдеқашан айналдырған. Дерекке жүгінсек, былтырғы демалыс маусымында ғана жасанды теңіз жағасында 1,5 млн адам демалған көрінеді. Дәл осы жерде көл жағалауындағы туризмге қатысты екінші жақтың да пікіріне құлақ түрген абзал. Анығы жағажайдағы демалушыларға қызмет көрсету деңгейінің төмендегі туралы жасыруға келмейді. Әсіресе, мөлдір суы мен ыспа құмы шипалы жағалау маусым кезінде қоқысқа көміліп қалады екен.
Рас, Қапшағайда демалысқа арналған түрлі нысан бар. Қонақүйлер, пансионаттар, демалыс базалары және жеке жағажай нысандары жыл сайын көбейіп келеді. Мұндай жағдайы жасалған демалыс нысандары негізінен көлдің демалыс аумағы аталатын бөлігіне орналасқан. Мұның дерлігі жекеменшік туристік нысандарға жатады. Соған сәйкес бағасы да жоғары. Демалыс орындары да туристерге ыңғайлы болу үшін бассейндер, аквапарктер, су аттракциондары мен яхта жалдау қызметтерін дамытып отыр екен. Әсіресе, кейінгі 4-5 жылдың жүзінде Қапшағай маңында жаңа заманауи демалыс кешендері ашылып, қызмет көрсету сапасы айтарлықтай жақсарды. Дегенмен жалпылама есеп бойынша нысандардағы сервистің деңгейі халықаралық стандарттарға сәйкес келмей отыр.
Жалпы, Қапшағай жағалауындағы демалыс туризмін дамытуға жергілікті билік барынша көңіл бөліп отырғанын айтуымыз керек. Әсіресе, туристер үшін қолжетімді жағажайлардың жағдайын жасау үшін қаржы бөлініп, қызу жұмыс істелуде.
– Былтыр Қапшағайға шомылу маусымында 1,5 млн турист келді. Оларға жүз қырықтан астам демалыс орны қызмет көрсетті. Көл жағалауындағы инфрақұрылымды дамытып, келушілерге сапалы қызмет көрсету мақсатында заманға сай демалыс орындары салынып, халық игілігіне беріліп жатыр. Қазір Қонаев қаласында туризм саласы бойынша 9 инвестициялық жоба бар. Сонымен қатар абаттандыру бойынша №8 қалалық жағажай мемлекет тарапынан инвесторларға берілді. Мұнан бөлек, 1 шақырымға созылатын қалалық жағажай аумағы абаттандырылып жатыр. Жалпы, Қонаев қаласының аумағында 2030 жылға дейін 26 инвестициялық жоба жүзеге асады. Олардың жалпы құны – 470 млрд теңге. Аталған жобалар сәтті жүзеге асқан жағдайда 5 мыңнан астам жаңа жұмыс орны ашылады, – дейді Қонаев қаласының әкімі Асхат Бердіханов.
Алматы облысының орталығы болғанына төртінші жылға аяқ басқанымен, Қонаев қаласында атқарылмаған шаруа шаш етектен. Соның негізгісі қаланың инфроқұрлымы мен коммуникациясына қатысты болып отыр. Қоқыс шығару да осы қатарда. Дерек бойынша, Қапшағайда қала бойынша күн сайын 20 тоннадан астам қоқыс шығарылады. Ал туризм маусымы қызған шақта бұл көрсеткіш екі есеге дейін тартады екен. Мұның сыртында жағажайды жалға алып, келушілерге қызмет көрсетуге бейімделген кәсіпкерлердің тек ақша табуға деген тойымсыз ұстанымы да көл жағалауындағы қоқыстың үйіліп жатуына әсер етеді екен. Сол сияқты қазіргідей дамыған заманда құм үстіне қада қағып, қаңылтыр қоршау жасап бизнес бастап кетуге тырысатындар бар. Бүгінде қала билігі осындай жүйесіздікпен күресуге кірісіпті.
Қалмаханбет МҰҚАМЕТҚАЛИ,
Алматы облысы