Голливудта Қазақстанның еңбек сіңірген әртісі, әнші, композитор Марат Омаровтың концерті өтті. «Анашым», «Жан гүлім», «Алғашқы махаббат» сияқты әндерімен халықтың жүрегін жаулаған сазгердің Лос-Анджелестегі ән кешінде оның көптеген шығармасы орындалды, – деп хабарлайды Aikyn.kz 24kz-ке сілтеме жасап.
Концертке Калифорнияда тұратын қазақ диаспорасының өкілдерімен қатар өзге де штаттардағы жерлестеріміз арнайы барды. Ескірмейтін есті әндер, анаға деген махаббат, Отанға деген сағыныш, жастық шақтың жарқын сәттері. Марат Омаровтың Лос-Анджелестегі кешіне жиналғандардың жанарынан осындай түрлі сезімдер байқалды.
Кейінгі жылдары АҚШ-та тұрып жатқан композитор тыңдарманына «Sunshine», «Miami», «Hello America», «Қазақстан-Америка» сынды жаңа әндерін ұсынды. Репертуарындағы кей әндер ағылшын тіліндегі нұсқада шырқалды.
«Біріншіден мұхиттың ар жағында концерт қойып, мынау әрбір өнерпаздың арманы ғой. Мына Голливудта, Голливудтың сахнасында, бұл кішкентай кезімнен арманым болған, әрине. Енді қырық жылдай еңбек етіп, Қазақстанда бірнеше шәкірт тәрбиелеп, соның, халықтың батасының арқасында деп ойлаймын осы Голливудқа ізім түсіп, арнайы, жай Голливуд емес, Лос-Анджелес, Калифорния штатының нағыз жүрегінде концерт беріп, киелі сахнада мақсат сол жастарды болашақта шығару өзіммен бірге. Яғни, достық көпірін салу», – деді Марат Омаров.
Марат Омаров «Әнші балапан» әнін жазып, талай жастың жұлдызын жағуға себепкер болғанын көпшілік біледі. Кеште сазгердің қызы Бибі Мариям жетекшілік ететін «Мариограф» би тобы, шәкірттері Асанәлі мен Аруай, нигериялық әнші Ричард Диджи өнер көрсетті. Айгүл Иманбаева, Динара Қайырқожа сынды қазақ эстрадасының жұлдыздары маэстромен бірге ән шырқап көпшіліктің ыстық ықыласына бөленді.
«Жырақта, елден шалғай жүрген қазақтар өзінің тілін, ділін, өнерін, салт-дәстүрін ұмытпасын деген үлкен ниетпен, осы концертті тарту етті деп өзім ойлаймын. Себебі келген көрермендерден білуге болады. Барлығы рахаттанып, үлкен бір қуанышты мерекеде, өзінің елінде отырғандай, үлкен кісілер ауылды сағынып, елді сағынып, көзіне жас алып отырған үлкен апаларымыз болды», – деді әнші, актриса Айгүл Иманбаева.
Голливудтағы концерт енді Майами, Вашингтон, Нью-Йорк қалаларында жалғасын таппақ.
Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.