Жиынға «AMANAT» партиясының Хатшысы Ержан Жылқыбаев, Партиялық бақылау комитетінің төрағасы, Мәжіліс депутаты Павел Казанцев, Қостанай облысы әкімінің орынбасары Гүлбарам Мұсағазина және тағы басқалар қатысты.
2024 жылдың қорытындысы бойынша Қостанай облысында 20 мыңға жуық жаңа жұмыс орны ашылды, ауыл шаруашылығы саласында жалпы сомасы 4,9 млрд теңге болатын 45 инвестициялық жоба, ал өнеркәсіп саласында 121 млрд теңгені құрайтын 28 ірі жоба іске асырылды.
Облыста Қостанай және Арқалық қалаларында, сондай-ақ Қостанай ауданына қарасты Заречный ауылында 4 мектеп пайдалануға берілді, 2 балабақша ашылды, 3 білім беру нысанына күрделі жөндеу жүргізілді. Бұдан бөлек, 21 денсаулық сақтау нысаны іске қосылып, 2 денешынықтыру-сауықтыру кешенінің құрылысы аяқталды, Қарабалық ауданындағы Орталық стадион қайта жаңартылды.
Сонымен қатар өңірде 1 100 шақырымнан астам автожол жөнделіп, 29 ауылға ауызсу жеткізілді, пайдаланылмаған 185,9 мың гектар жер мемлекет меншігіне қайтарылды. 497,8 мың шаршы метр тұрғын үй (5,1 мың пәтер) салынды, қалалар мен ауылдарға 1314 бейнебақылау камерасы орнатылды.
Атқарылған жұмыстарға қарамастан, жиында ерекше бақылауды қажет ететін мәселелер көтерілді. Партия хатшысы Ержан Жылқыбаев әкімдікті маңызды нысандардың мерзімінде аяқталмауы үшін қатаң сынға алды.
«Өткен жылы Қостанай облысы бүкіл елмен бірге алапат су тасқынын бастан өткерді. Мыңдаған адам зардап шекті. Су үйлерді, көпірлерді, жолдарды шайып кетті. Біз осы қайғылы жағдайдың куәсі болдық. Алайда бір жыл өтсе де, жүйелі шешімдерді көрмей отырмыз. Мәселен, Қостанай қаласы аумағындағы Тобыл өзенінің арнасын тазалау, Қарасу ауданына қарасты Степное ауылындағы бөгетті қалпына келтіру жұмыстары әлі аяқталмаған. Мұндай маңызды мәселелерде мерзімнің кейінге шегерілуіне жол беруге болмайды», – деді ол.
Қостанай облысы әкімінің орынбасары Гүлбарам Мұсағазина кейбір нысандарда жұмыстар дер кезінде аяқталмағанын мойындап, әлі де жалғасып жатқанын айтты.
«Біз жауапкершілікті мойнымызға аламыз. Иә, мердігерлер мерзімді бұзды, кейбір нысандар бойынша қайта сараптама жүргізуге тура келді. Атап айтқанда, Степное ауылындағы бөгет биыл толық аяқталады, нысанның дайындық деңгейі қазірдің өзінде 70%-ды құрайды. Ал Тобыл өзенінің арнасын тазалау бойынша жұмысты 2025 жылға дейін ұзарту туралы қосымша келісім жасалды», – деді ол.
Партия хатшысы Ержан Жылқыбаев білім беру саласындағы мәселесі шешілмеген нысандарға да назар аударды. 2023 жылдан бері Қостанай қаласындағы екі мектептің құрылысы аяқталмаған. Оның бірі – «Құнай» шағын ауданында 900 орындық, екіншісі – «Береке» шағын ауданында 980 орындық мектеп.
«Егер бұл мектептер шалғай ауылдарда болса, логистика мен қашықтық мәселелерін көтеруге болар еді. Бірақ бұл – Қостанай қаласының өзінде салынып жатқан мектептер. Облыс орталығында тиісті бақылау болмаса, аудандарда не болып жатыр? Оның үстіне, 2024 жылдың қаңтарында «Құнай» шағын ауданында салынып жатқан мектептің спорт залының төбесі жартылай опырылып түсті. Қазіргі уақытта балалар мектепке бару үшін күн сайын 10 шақырымнан астам жол жүруге мәжбүр. Одан бөлек, олар мектептің шамадан тыс толып кетуіне байланысты тар жерде оқуға мәжбүр», – деді ол.
Бұл мәселеге қатысты Қостанай облысы әкімінің орынбасары Гүлбарам Мұсағазина «Береке» шағын ауданындағы мектепті салған мердігердің жауапсыздық танытқанын, ал «Құнай» шағын ауданындағы мектепке техникалық тексеру жүргізіліп, қазіргі уақытта жобалық сараптама жасалып жатқанын мәлімдеді. Ол екі мектеп те биыл пайдалануға берілетінін айтты.
«AMANAT» партиясы жанындағы жұмыс тобы мен Партиялық бақылау комитетінің мүшелері сайлауалды бағдарламаның мерзімінде орындалмаған тармақтарын жеделдетудің маңыздылығына тоқталды. Оның ішінде өткен жылы тапсырылуы керек болған Қостанай қаласындағы өрт сөндіру депосы, Жітіқара ауданына қарасты Чайковское ауылындағы және Қарабалық ауданына қарасты Лесное мен Станционное ауылдарындағы су құбыры нысандары, Заречный ауылындағы емхана, Қарабалық ауданына қарасты Гурьяновка ауылындағы мектеп және басқа да жобалар бар.
Партиялық бақылау комитетінің төр-ағасы Павел Казанцев сайлауалды міндеттемелердің орындалуын қатаң бақылауға алуды талап етті.
«Су мәселесі, су тасқынының алдын алу, өрт қауіпсіздігі секілді салаларда сылтау болмауы керек. Мәселе – «неге болмады?» дегенде емес, «жағдайды түзету үшін не істелді?» дегенде. Халыққа түсініктеме емес, жұмыс істеп тұрған су құбырлары, таза өзендер және олардың үйлерін жаңа су тасқынынан қорғайтын дайын инфрақұрылым қажет», – деп атап өтті ол.
Жиын қорытындысы бойынша Қостанай облысы әкімдігі мен басқа да мемлекеттік органдарға бірқатар ұсыныстар берілді. Оның ішінде мердігер ұйымдарға бақылауды күшейту, қажет болған жағдайда жауапсыз мердігерлерді ауыстыру; сайлауалды бағдарламаның орындалу мерзімін кешіктірген кейбір басшылардың жеке жауапкершілігін қарастыру; жобаларды аяқтау үшін бюджеттен тыс инвестицияларды тарту жұмыстарын жеделдету ұсынылды.