Үш күнге созылған жарыс тартысты өтті. Ұлттық қауіпсіздік комитеті ұйымдастырған сайысқа бас-аяғы 24 команда қатысып, 200-ден астам спортшы өнер көрсетті. Ойын кезінде ала допты алақанында ойнататын шекарашылар талай байрақты бәсекеде бақ сынап жүрген кіл мықтылардан құралған болатын. Олардың құрамында М.Рамазанов, А.Сидоренко, С.Абдинуров, В.Исаеев, Б.Малкайдаров, А.Асхатов, Д.Асхатов, А.Прищепа, Д.Бекбаев, И.Быцко бар.
«Баласы бәйегеге шапса, анасы үйде отырып тақымын қысады» демекші, әріптестерінің әр қимылын жіті бақылап отырған Шекара академиясының профессорлық-оқытушылық құрамы мен №3 оқу дивизионы курсанттары ойын біткенше тікесінен тік тұрып, шапалақ ұрып қолдау көрсетті. Шекара академиясының әнұранын шырқап, ойыншыларға рухтық қолдау көрсете білді.
Қалай айтсақ та, өзара бақ сынасқан спорт саңлақтарының жарысы жоғары деңгейде өтті. Іс-шараның басты мақсаты да салауатты өмір салтын насихаттап, әр облыста орналасқан Ұлттық қауіпсіздік комитетінің департамент қызметкерлері шеберлігін шыңдау еді.
Ұлттық қауіпсіздік комитетінің ұжымы ұйымдастырған волейбол жарысынан Шекара академиясының құрама командасы І орын, Солтүстік Қазақстан облысынан ат терлетіп келген команда ІІ орын, өздеріне қатты сенім артып келген Павлодар облысынан келген команда ойыншылары ІІІ орынға тұрақтады. Жақсы ойын өрнектерін көрсеткен ойыншыларына ҰҚК Төрағасының орынбасары генерал-майор А.Наймантаев әртүрлі номинация бойынша мақтау грамоталары мен сыйлықтар табыстады.
Жанат ЖАБЫРБЕКОВ,
ҚР ҰҚК Шекара академиясының
баспасөз хатшысы