Кітаптың тұсаукесер рәсіміне Сенат депутаты Нұртөре Жүсіп, қоғам қайраткері Светлана Жалмағамбетова, қоғам қайраткері Сайлау Батырашұлы, филология ғылымдарының докторы Кәрімбек Құрманәлиев және бірқатар зиялы қауым қатысты.
Қаламгер өмірлік тәжірибесіне сүйене отырып қазақ отбасындағы тәрбиенің маңызы, ата-ана мен ұрпақ арасындағы сабақтастық, сондай-ақ отбасылық берекені сақтау мәселелерін жан-жақты қарастырады. Кітап 3 тараудан тұрады. Әр тарауы отбасы құндылықтарына, ұрпаққа берілетін тәрбиеге негізделген.
– Бұл кітапты жазуда әр қазақ отбасының босағасы кең, шаңырағы биік болсын деген ниетті мақсат тұттым. Сондай-ақ әр шаңыраққа пайдасы тисе екен. Бір кезде жас келіншек менің жас отбасыға айтқан ақыл-кеңесімді тыңдап ажырасу райынан қайтқанын айтты. Осындай шынайы оқиғалар да менің «Отбасы берекесі» кітабын жазуыма түрткі болды. Отбасында ер мен әйелдің орны бала үшін маңызды. Ер адамның баласы алдында үш міндеті бар: жақсы ана табу, жақсы есім қою және жақсы тәрбие беру. Ұлттық құндылық насихатталатын, отбасылық ортадағы рухани бірлікті арттыруға ықпал ететін туынды оқырманға ұнайды деп үміттенемін, – деді Оразкүл Асанғазы.
Жиын барысында жиылған қонақтар автордың еңбегіне қатысты пікірін айтты. Қоғам қайраткері Әділ Ахметов «Отбасы берекесі» туындысын жас отбасы үшін таптырмас кітап екенін атап өтті.
– Бұл кітапты ең бірінші жастар оқуы керек. Жақсы мақсатқа ұмтылып жүрген жастарға көбірек қажет. Автордың өзі жастарға үлгі. Жастарға арналған кітап болғандықтан, ене мен келіннің орны, балаға қандай ана болуы керек дегендей түрлі кеңес айтылады. Бір деммен оқылатын кітап екен. Кітапты жазу кезінде автордың ізденісі байқалады, көп отандық ғалымдардың еңбегіне үңілген. Оны оқымау мүмкін емес, – деп баға берді Ә. Ахметов.
Алқалы жиынға келгендер кітаптың қоғам үшін маңызды екенін талқылап, ойларын ортаға салды. Іс-шара соңында қонақтар Еркеғали Рахмадиев атындағы Мемлекеттік академиялық филармонияның Қазақ оркестрінің дирижері Нұрлан Бекеновтің орындауындағы күйді тыңдап, тарқасты.
Сымбат БАУЫРЖАНҚЫЗЫ