Елімізде 22 мыңнан астам ғалым бар. Соның ішінде ғылым мен білімге бет бұрып, түрлі жобамен топ жарған жас буынның қатары жыл сайын артып келеді.
Ғылымда түрлі жастар бар, жасағаны бір бөлек
461
оқылды

Цифрлық әлемнің жаңа өнімін жа­сап, әлеуметтің де игілігіне жарайтын тың құ­рал құрастырған және жоқтан бар шығарған жас­тардың озық технологияның дамуына ілесуі – дамыған елдер көшінен қалмағанымызды білдіреді. Осындай жастардың бірқатарымен аз-кем тілдесіп, жаңашыл көзқарас пен ерекше жобалардың құрылымын білуге тырыстық.

Адамның цифрлық прототипі – виртуалды көмекші

Жақында Назарбаев уни­вер­­ситетінің Ақылды жүйе­лер және жасанды интеллект инс­титуты (ISSAI) адамның цифр­лық прототипін – Umay (Ұмай) көмекшісін жасады. Тех­нологиялық даму дәуі­рінде Назарбаев универ­си­те­тін­дегі ISSAI қазақ тілінде адам мен ком­пьютердің тиімді өзара әре­ке­т­тесу жолдарын іздеуді жал­ғас­­тыру­да. Бұл бағыттағы келесі сер­пілісі ISSAI командасы жа­қын­да мақ­танышпен ұсынған адам­ның ал­ғашқы цифрлық про­тотипі – Ұмай есімді ассистенті.

Ұмай – шынайы әйел аватары ретін­де цифрлық түрде жасалған, ресми тілінде сөйлейтін виртуал­ды көмекші. Оның мүмкіндіктері ғылымды, білім беруді, тарихты, технологияны және медицинаны қо­са алғанда кең ауқымды сала­лар­ды қамтиды. Аватарға ерекше мағыналы түркі мифология құ­дайы­ның аты берілген. Жоба құ­рас­тырушысы Атакан Ворол бұл атаудың қазақ мәдениетімен бай­ланысты екенін атап өтті. Екін­шіден, Ұмай цифрлық тұлға­ның алғашқы прототипі болған­дық­тан, команданың идеясы бойын­ша, ол болашақ цифрлық кө­мекшілердің «анасы» ретінде қа­былдануы мүмкін.

– Біздің басты мақсатымыз – қазақстандық зияткерлік күштің, атап айтқанда шағын ISSAI ко­ман­дасының озық мүмкін­дік­те­рін көрсету. «Біз мұны Қазақ­стан­да жасай аламыз» деп ауыз тол­тырып айту. Umay жұмысында біз­дің институт әзірлеген бір­қа­тар негізгі технологияларды пай­да­ланады. Олардың ішінде мәтін­ді сөйлеуге түрлендіру, сөзді ав­то­матты түрде тану, нейрома­ши­налық аударманы жасау және фо­тореалистикалық аватар қол­дануы», – деді профессор.

Ғалымның айтуынша, жоба­ның негізгі техникалық қиын­ды­ғы жүйені біріктіру, яғни команда бір уақытта бірнеше AI жүйелерін іске қосуы керек болған. Мыса­лы, Ұмай OpenAI платформа­сы­ның ChatGPT чат-боты арқылы сұрақ­тарға жауап табады. Бірақ бұл боттың қазақ тіліндегі жұмы­сы әлі сапасыз екендігі бәріне мә­лім. Бұл шектеуді жеңу үшін Ұмай Назарбаев университетінде ISSAI әзірлеген Tilmash ней­ро­машиналық аудармасының же­тіл­дірілген үлгісін пайдаланады. Сонда прототип пайдалану­шы­лар­дың сұрақтарын алдымен ағыл­шын тіліне аударып, кейін ChatGPT берген жауаптарды қай­тадан қазақ тіліне аударады.

«Біздің институт биыл Tilmash деп аталатын 4 тілге екі жақ­ты машиналық аударма жа­сайтын жүйесін жасаған. Әртүрлі стильдегі үлкен мәтіндік қордан құрас­тырылған бұл модель Google және Yandex аударма­шы­лары­мен бәсекелесе алады. Яғни, Tilmash қазақ тілінде айтылған сұрақтарды ағылшын тіліне ауда­ра­ды, содан кейін сұраныстар ChatGPT-ге барады, ағылшын ті­ліндегі берілген жауаптарды Tilmash қайтадан қазақ тіліне аударады. Сосын арнайы техно­ло­гия арқылы біз тексті дауысқа айналдырамыз», – деп түсіндіреді Umay әзірлеушілерінің бірі, ISSAI-дің аға деректер талдау­шы­сы Асқат Күздеуов.

Unreal Engine 5 бағдарламалық жа­сақтамасымен жұмыс істейтін Umay нақты уақытта жоғары са­па­лы бет анимациясын қамта­ма­сыз етеді. Ол қазақ тілінде табиғи жә­не еркін сөйлесуді жеңілдету үшін ISSAI-да әзірленген ал­дың­ғы қатарлы сөйлеу технология­ла­рын, соның ішінде автоматты түр­де сөйлеуді тану (ASR) және мә­тіннен сөйлеуге айналдыратын (TTS) технологияларын бірікті­ре­ді.

Әрі қарай даму нәтижесінде Umay көптеген салада тиім­­ділікті арттыру және шығын­дар­ды азайтуға көмектесетін қосымшасы бола алады. UMAY-ды одан әрі дамытып қолдану үшін үлкен тілдік модель, яғни қа­зақ тіліндегі жасанды интел­лек­т қажет. Бұл ұзақ жолдың басы ғана деп атап өтті Назарбаев уни­верситетінің сарапшылары.

Полиэтилен пакетке балама өнім 

Қоршаған ортаның ластануы – қазіргі заманның өзекті мә­се­лелерінің бірі. Бұл проблеманы шешу үшін қазақстандық жас ға­лым Нариман Қайырбеков биологиялық ыдырайтын ма­те­риал жасап шығаруға кірісті. Ол полиэтилен пакеттердің орнына табиғи полимерлерден жылдам ыды­райтын балама әзірлеуді қол­ға алған. 

Ғалымдар бұл жобаны жүзеге асыру үшін ғылыми зерттеулер жүр­гізіп, табиғи полимерлердің қа­сиеттерін талдады. Олар мате­риал­дың негізіне крахмал мен целлюлозаны алуды жоспарлап отыр. Қазір зерттеу жұмыстары жал­ғасып, ғалымдар қаржылық қол­дау алу мақсатында ғылыми грант конкурсына қатысып отыр.

– Бұл жобаның негізгі бағы-ты – табиғи полимерлер негізінде биологиялық ыдырайтын ком­позициялық материалдар әзірлеу. Ал полиэтилен – мұнай қалдық­та­ры­нан шыққан материал. Бы­лайша айтқанда, полиэтилен ол полимердің күрделі химиялық қо­сылысы. Сондықтан оның ыды­­­­рауына өте көп жыл қажет. Ал біз ойлап тапқан материалы жыл­дам ыдырайды, – дейді Нариман Қайырбеков.

Нариман Қайырбеков тек эко­­логиялық жобалармен ғана шек­­телмей, баламалы энергия көз­дерін зерттеуге де көңіл бөлу­де. Ол ұлттық ядролық орталық­пен бірлесіп, сутектік энергия эле­менттерін әзірлеу жобасына қа­тысып жатыр. Бұл технология қор­шаған ортаға зиян келтірмей, таза энергия өндіруге мүмкіндік береді.

Жас ғалымның ғылымға де­ген қызығушылығы мектеп ке­зі­нен басталған. Ол халықаралық олим­пиадалар мен ғылыми жо­ба­лар байқауларына қатысып, өз бі­лімін шыңдаған. Қазір ол на­но­материалдар арқылы медицина саласында да зерттеу жүргізуді жос­парлап отыр.

Қазіргі жастардың ғылымға деген ынтасы жылдан-жылға ар­тып келеді. Олар экологиялық проб­лемаларды шешуге, бала­ма­лы энергия көздерін дамытуға жә­не озық технологияларды ен-гі­зу­ге ұмтылуда. Қазақстандық жас ғалымдардың жаңашыл идея­лары еліміздің ғылыми-тех­никалық да­муына үлкен үлес қо­сатыны сөз­сіз.

Қарттарға арналған инновациялық балдақ

Ерзат Мырзахан – ғылым жо­лына жаңа қадам басқан талантты жас ғалымдардың бірі. Ол қарт адам­дарға арналған көпфунк­цио­налды балдақ жасап шығарды. Әл-Фараби атындағы Қазақ ұлт­тық университетінің (ҚазҰУ) 1-курс студенті әзірлеген бұл құ­­­­рылғы қарттардың баспалдақ­пен жүруін жеңілдетуге бағыттал­ған. 

Жас өнертапқыштың айтуын­ша, балдақтың басты ерекшелігі – оның баспалдаққа бейімделу мүмкіндігі.

«Баспалдаққа көтерілген кез­де бұранда механизмін пайда­ла­нып, құрылғының ұзындығын қа­жетті деңгейде реттеуге болады. Кейін балдақты баспалдаққа ті­реп, бекіту арқылы қарт адам жо­­ғары көтеріле алады», – дейді жас ғалым.

Бұдан бөлек, балдақтың қауіп­­сіздік деңгейін арт­тыра­­тын бірқатар инновациялық шешімдер енгізілген. Құрылғыға GPS жүйесі орнатылған, бұл қарт адамның жүрген жерін бақылауға мүм­кіндік береді. Егер пайда­лану­шы көшеде құлап қалса не­месе қандай да бір кедергіге тап бол­са, оның жақындарына ұялы те­лефон арқылы хабарлама келе­ді.

«Балдақтың алдыңғы бөлі­гін­де қызылнұр (инфрақызыл сен­сор) орналасқан. Егер жолда қан­дай да бір кедергі болса, құ­рыл­ғы автоматты түрде дабыл қа­ғып, иесін ескертеді. Сонымен қа­тар балдақ құлаған жағдайда не­месе көлденең қалыпта тұрған­да автоматты түрде дабыл жүйесі іске қосылады. Түнде жүруді жеңіл­дету үшін арнайы жарық­тан­дыру шамдары қарастырыл­ған», – дейді Ерзат Мырзахан.

Жас ғалымның айтуынша, бал­дақ қарапайым, арзан, бірақ са­палы материалдардан жасал­ған. Сондықтан оның нарықтағы бағасы да қолжетімді болмақ.

Бұл инновациялық балдақ ег­де жастағы адамдардың өмір са­пасын арттырып, олардың қауіп­сіздігін қамтамасыз ететін тиім­ді құралға айналары сөзсіз.

 

Адамзаттың дамуы мен өркендеуінің негізі – ғылым. Жоғарыда айтылған кейіпкерлер – ғылымға да, қоғамға да үлесін қосып жүрген жастардың бір парасы ғана. «Талап қыл артық білуге» дегендей-ақ жаңа заман буыны көпті білуге талапты. Қоғамға пайдасын тигізуді мақсат тұту – олардың міндеті болса, ондай жастарды көпке таныстыру, еңбегін бағалау – біздегі міндет. 

Әсет ҚАЛИ,

Сымбат БАУЫРЖАНҚЫЗЫ