Тараз қаласында «AMANAT» партиясының қолдауымен Жамбыл облысының әкімдігі Жамбыл Жабаевтың 179 жылдығына орай «Жамбыл – менің жай атым, халық – менің шын атым!» республикалық ақындар айтысын ұйымдастырды.
Жамбылдағы аламан
953
оқылды

Сөз барымтасына Мұхтар Ниязов, Жан­сая Мусина, Рүстем Қайыртай, Ба­тыр­жан Кәдірбай, Қалижан Білдәш, Шұ­ғайып Сезімхан, Нұрзат Қару, Серік Қуан­ған, Рауан Қайдар, Мұхтар Қонар­бай, Әсет Дүйсебаев, Нұрлыбек Құр­ма­нов, Рай Дөңбай сынды аузы дуалы ақын­дар қатысты. 

Мемлекеттік тілдің мәртебесін арт­тыру мақсатында ұйымдастырылған ала­ман айтыста ақындар елдің жайын жыр­лап, ұлттық құндылықтарымызды ұлық­тады. Сондай-ақ қоғамдағы түрлі оқи­ға мен елдік мәселелерді арқау етіп, сөз сайысының көрігін қыздырды. 

Осылайша, Қазақстанның еңбек сіңір­ген қайраткері, айтыс өнерінің жа­на­шыры Жүрсін Ерман бастап, Айт­мұ­хан­бет Исақов, Жасұлан Әбдіхалық, Ахметжан Өз­беков, Роза Мұқанова, Мәжіліс депу­та­ты, «AMANAT» партиясы фракциясы­ның мүшесі Жанарбек Әшімжан сынды аза­маттар қостаған қазылар алқасының құра­мы жыр додасының әділ бағасын бер­ді. 

Нәтижесінде, бас жүлдені Серік Қуан­ған (Шығыс Қазақстан облысы) ен­шіледі. Ал 1-орынға Мұхтар Ниязов (Қызылорда облысы) лайық деп таныл­ды. Бұл ретте 2-орынды Жансая Мусина (Батыс Қазақстан облысы) қанжығасына байлады. Осы орайда 3-орынды Мұхтар Қонарбаев (Астана қаласы) иеленді. 

Бұдан бөлек, Әсет Дүйсебаевқа (Жам­был облысы) – «Ұлбике ақын», Рүс­тем Қайыртайға (Абай облысы) – «Кенен Әзірбаев», Шұғайып Сезімханға (Алматы) – «Бауыржан Момышұлы» жә­не Рауан Қайдарға (Павлодар облысы) – «Әзімбек Жанқұлиев» атындағы арнайы жүлделер табысталды.

Өз кезегінде, айтыс тізгінін ұстаған Мә­жіліс депутаты, «AMANAT» партиясы фрак­циясының мүшесі, ақын Аманжол Әлтай дәстүрлі доданың жоғары дең­гей­де өткенін атап өтті. 

«Бұл айтыста ұлан-ғайыр даламыздың төрт құбыласын түгендеп, еліміздің түк­пір-түкпірінен келген айтулы ақындар бас қосты. Айтыс – қазақ халқының ұлт­тық ерекшелігін айқындайтын бекзат өнер. Топқа түскен ақындар Жамбыл атамыздың болмысын жырлап қана қоймай, қоғамдағы күрделі мәселелерді де қозғап, көзіқарақты көрерменнің көңі­лінен шыққан орамды ой айта білді», – деді Аманжол Әлтай. 

Ал Шығыс Қазақстан облысының на­мысын қорғап, жүзден жүйрік, мың­нан тұлпар шыққан Серік Қуанған ай­тыс­тың жоғары деңгейде өткізілгенін тіл­ге тиек етіп, ұйымдастырушыларға ал­ғысын білдірді. 

«Халықтың көкейінде жүрген мә­се­лелерді қозғауға тырыстық. Қарсы­лас­та­рым да осал болған жоқ. Кілең «сен тұр, мен атайын» деген мықтылар жи­нал­ды. Сонысымен де Жамбыл атамызға арналған жыр додасы аса тартысты өтті. Ұйымдастырушыларға шынайы риза­шылығымды білдіремін», – деді ол. 

Өз кезегінде, Жамбыл облысы әкімі­нің бірінші орынбасары Нұржан Кален­деров барша ақынға алғысын айтып, жыр додасы алдағы жылы да жалғасаты­нын жеткізді.