Софияда (Болгария) бокстан «Странджа» кубогы аясында қыз-жігіттеріміз сәтті өнер көрсетіп, жалпы медальдық есепте тарихи 1-орынға ие болды. Беделді халықаралық турнирдің ең үздік боксшысы Төрехан Сабырхан атанды.
Бокстан айымыз оңынан туды
2,242
оқылды

Ұлттық құраманың әйелдер сапында 13 спортшы жартылай финалға дейін жетті. Айта кетейік, 81 келіге дейінгі салмақта сынға түсетін Жібек Жарасқызы жеребе қорытындысы бойынша бірден финалға өтті. Бұл осы салмақ дәрежесінде қатысушылардың аз болуына байланысты. Дәл осындай жағдай 81 келіден жоғары салмақта да қайталанды. Бұл салмақта Дина Исламбекова жартылай финалдық жекпе-жек өткізбей-ақ шешуші кезеңге шықты. Қалған қыздарымыз өз қарсыластарын жеңіп, сәтті өнер көрсетті. Осылайша, кіші әлем чемпионаты аталып кеткен «Странджа» кубогының финалына жеті спортшы қызымыз шықты. Алайда финалдық бәсекелерде қыздарымыз сүрініп, тек Ләззат Күнгейбаева 81 келіде алтыннан алқа тақты. Қалған қыздарымыз атап өтсек, Әйгерім Сәттібаева (48 келі), Әнел Сақыш (54 келі), Айдана Забынбекова (57 келі), Римма Волосенко (60 келі), Жібек Жарасқызы (81 келі) күмісті қанағат тұтты. Ал финалға өте алмаған сегіз боксшы жарысты қола жүлдемен аяқтады. Қола медальға ие болған спортшылардың қатарында Элянур Турганова (50 келі), Жансая Рахымберді (52 келі), Жазира Орақбаева (52 келі), Сымбат Әлиасқар (54 келі), Лаура Есенкелді (63 келі), Гаухар Шайбекова (66 келі), Азиза Исина (70 келі), Шұғыла Нәлібай (75 келі) бар.

Қазақстан ерлер құрамасының нәтижесіне турнирді бес алтын, 9 күміс және 4 қоламен көш бастады. Тәуелсіздік жылдардан бері мұндай нәтиже тіркелмеген еді. Бізден кейін Өзбекстан екінші орынға жайғасса, турнир қожайыны Болгария үздік үштікті түйіндеді.

Осы жарыстың тағы бір қызық тұсы ерлер арасында төрт салмақта, әйелдер арасында бір салмақта қазақстандық боксшылар финалда өзара жолықты.

Ерлер арасында 63,5 келі салмақта Ертуған Зейнуллинов пен Мұхаммедсабыр Базарбайұлы бір алтынға таласса, 71 келі салмақ дәрежесінде Абылайхан Жүсіпов пен Фарух Тоқтасынов өзара кім мықтыны анықтады. Ал 75 келі салмақта Сабыржан Аққалықов пен Тимур Нұрсеитов бір-бірімен чемпиондық атақты сарапқа салды. Сондай-ақ 86 келі салмақта Нұрбек Оралбай мен Бекзад Нұрдәулетов өзара мықтыны анықтады.

Әйелдер арасында аса ауыр  салмақта сынға түсіп жүрген боксшылар Ләззат Күнгейбаева мен Дина Исламбекова алтынға таласты.

Ерлер құрамасынан жеңіс тұғырының ең жоғары сатысына Ертуған Зейнуллинов (63,5 келі), Төрехан Сабырхан (67 келі), Абылайхан Жүсіпов (71 келі), Сабыржан Аққалықов (75 келі), Бекзат Нұрдәулетов (86 келі) көтерілді. Күміс жүлдеге Даниял Сәбит (51 келі), Тимур Қабдешов (54 келі), Серік Теміржанов (60 келі), Мұхаммедсабыр Базарбайұлы (63,5 келі), Фарух Тоқтасынов (71 келі), Тимур Нұрсейітов (75 келі), Нұрбек Оралбай (86 келі), Айбек Оралбай (92 келіден жоғары) ие болды. Қола жүлде Теміртас Жүсіповке (48 келі), Оразбек Асылқұловқа (57 келі), Талғат Сырымбетовқа (60 келі), Данияр Рахымбердиевке (92 келі) бұйырды. 

Жарыс қорытындысы бойынша 71 келідегі Төрехан Сабырхан ең үздік боксшы атанды. Бұл да тарихи жетістік деп айтсақ болады. Өйткені ол «Странджа» кіші әлем чемпионатында қазақтың жігіттері арасында алғаш рет былғары қолғап шебері атанып отыр. Небәрі 19 жастағы спортшымыз жастар арасында барлық титулды жеңіп алған еді. 

Қайрат Сатжанов баптаған құрамамыз сәл тыныққаннан кейін алдағы әлем және құрлықтық аламандарға дайындықты бастайды. Страджа кубогы жылдың ең алғашқы халықаралық сайысы, сәйкесінше біздің команда үшін өзіндік іріктеу саналады. Яғни, бапкерлер құрамы әр салмақтың үздіктерін осы жерде анықтады. Енді алдағы жарыстардың маңыздылығына қарай нөмірі бірінші және екінші боксшыларды бәсекеге араластырады.

Әсет ҚАЛИ