Түркістан облысында патрульдік полиция инспекторы Қанат Ғабитов қызмет бабында қаза тапты, – деп хабарлайды Aikyn.kz.
Қайғылы оқиға 5 наурызда Жібек-Жолы – Жетісай тасжолында болған. Полиция экипажы жол қозғалысының басқа қатысушыларына қауіп төндірген тәртіп бұзушыны қуған кезде апатқа ұшыраған.
Жол-көлік оқиғасы салдарынан Қанат Ғабитов оқиға орнында көз жұмды. Тағы алты адам түрлі жарақат алып, аудандық ауруханаға жеткізілді.
ҚР Ішкі істер министрі Ержан Сәденов аталған жағдайды растап, Facebook парақшасында жазба жариялады.
"Қызметтік борышын атқару кезінде қаза тапқан Түркістан облысы Полиция департаментінің патрульдік полиция инспекторы, полиция аға лейтенанты Қанат Ғабитовтың туыстары мен жақындарына шын жүректен көңіл айтамын", – деп жазды.
Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.