Халықаралық әйелдер күні мерекесі қарсаңында «AMANAT» партиясы Түркістан облыстық филиалы өндірістік салада еңбек етіп жүрген қыз-келіншектерге құрмет көрсетті.
Әйелдің еңбегі әлемді жылытады
1,519
оқылды

Мемлекет басшысының Жарлығымен белгіленген Жұмысшы мамандықтары жылы аясында, партияның өңірлік филиалының Әйелдер қанаты Кентау қаласындағы №5 Жылу энергоорталығында «Өндірістегі әйел – ел құрметіне ие» мерекелік іс-шарасын өткізіп, стратегиялық маңызы бар кәсіпорында жұмыс істейтін арулар қадір-құрметке бөленді.

Айта кету керек, Кентау қаласын жылу­мен қамтамасыз етуші бұл кә­сіп­орын­ның техникалық реконструкциядан өтуі «AMANAT» партиясының Респуб­ли­­­калық сайлауалды штабымен қада­ға­лау­ға алынып, атқарылуы керек жаң­ғырту жұмыстары партияның Сайлауал­ды бағдарламасын Түркістан облысында іске асыру жөніндегі Жол картасына ен­ген болатын. Биылғы жылыту мау­сы­мын­да ауқымды жаңғырту жұмыс­та­ры­ның бірінші кезеңі толығымен аяқталып, кентаулық тұрғындарға беріліп отырған жылудың сапасы едәуір жақсарды.

Кәсіпорынның жоспарлы өндірістік қуа­­тына шығуына осында күндіз-түні уа­­қытпен санаспай тер төккен аза­мат­тар­­дың еңбегі ұшан-теңіз. Алып өндіріс орнының қалыпты жұмыс істеуіне ер-аза­маттармен бірге аруларымыз да қа­жыр-қайратын жұмсады, белгіленген жұ­мыс межесіне табандылықпен қол жет­кізді. Жүрегі нәзік болғанымен, тау­дай еңбегі бар қыз-келіншектерді ар­найы құттықтауға «AMANAT» партиясы Түр­кістан облыстық филиалының төра­ға­сы Алтынсары Үмбетәлиев, партияның өңірлік филиалы Әйелдер қанатының кеңес­шісі, Түркістан облыстық мәсли­ха­­­тына Кентау қаласынан сайланған де­путат Қалыйма Жантөреева, Кентау қа­ласының әкімі Жандос Тасов, партия фи­­лиалының жауапты қызметкерлері кел­ді. Кәсіпорынға келген ресми өкілдер ал­дымен мұндағы кешенді жаңғырту жұ­мыстарының барысын қадағалап, бұл бағытта атқарылып жатқан жұмыстармен танысып шықты.  

Кәсіпорынның өндірістік алаңында жи­налған жұртшылық үшін Түркістан қалалық мәдениет үйінің «Яссы» халық­тық этнофольклорлық ансамблі қазақ ха­л­­­қының ұлттық сазын шертіп, мере­ке­лік көңіл күй сыйлады. Мәдениет үйі­нің әншілері халық арасында кеңінен та­нымал «Ерке қыз», «Анамның ақ жау­лығы», «Ана туралы жыр», «Әйелдің бәрі әдемі», «Абзал ана» әндерін орындап, жұ­мысшылардың қошеметіне бөленді. 

Салтанатты жиын барысында сөз ал­ған облыстық партия филиалының тө­рағасы Алтынсары Үмбетәлиев:

«Біз Жұмысшы мамандықтары жы­лындағы ең алғашқы іс-шарамызды Ха­лық­аралық әйелдер күні қарсаңында пар­тиямыздың ерекше бақылауындағы №5 жылу-энергоорталығынан бастауды жөн көрдік. Себебі 2023 жылы өткен де­пу­таттық сайлауда партия Төрағасы Ерлан Қошанов осында келіп, өз­деріңіз­бен кездесіп, энергоорталықты түпкі­лік­ті модернизациялаудан өткізуге уәде бер­ген еді. Төраға уәдесінде тұрды. Мә­жі­ліске бара сала, орталықты қайта жаң­ғыртуға бюджеттен 17,7 млрд теңге бөл­­діртіп, энергоорталықтың бес қазан­дығы, 6,6 шақырымдық магистраль жөн­деуден өткізілді. Биыл бұл жұмыстар жал­ғасын тауып, екі қазандықты жөндеу, 14,7 шақырымдық ішкі жүйелерді ауыс­тыру міндеттері атқарылатын болады», – деді. 

Мерекелік лебізін білдірген «AMANAT» партиясы Түркістан облыс­тық филиалы жанындағы Әйелдер қанатының кеңесшісі Қалыйма Жан­төреева қоғамда әйелдердің алар орны айрықша екенін айтты. 

«Сіздер ауыр жерде жұмыс істе­сеңіз­дер де, жүректеріңізді нәзік деп білеміз. Бүкіл қала халқы жылусыз қалғанда, сіз­дермен бірге мен де тоңдым. Қиын­дықтың бәрі артта қалды, кәсіпорын иы­ғын тіктеді. Осында еңбек етіп жүрген қыз-келіншектердің ел еңсесін тіктеуге, қуатын арттыруға, шуақты күндерін қам­туға қосқан қомақты үлесі бар деп бі­лемін», – деді ол. Осы ретте кәсіпорын­да жұмыс істейтін 81 аруға кестелі ора­мал­ды мерекелік тарту ретінде ұсынды.

Жұмысшы қыз-келіншектерге деген ыстық ілтипатын Кентау қаласының әкі­мі Жандос Тасов та білдіріп, жылу-энергоорталық қалпына келтіру жұмыс­тары елді біріктірген жобаға айналғанын айтты. Қазір бүкіл қала халқы осында еңбек етіп жүрген азаматтарға айтар ал­ғы­сы көп екенін білдірді. Берекелі ең­бегімен абырой-беделі биік болған ұжым­ға алғысын білдіре отырып, ару­лар­ды көктем мерекесімен құттықтады.

№5 Жылу-энергоорталық директоры Саяхат Ыбышев кәсіпорынға арнайы ке­ліп, мерекелік көңіл-күй сыйлаған «AMANAT» партиясының өкілдеріне өзінің және ұжымның атынан шексіз ри­зашылығын білдірді. Өндіріс орнын толық қуатына шығарудағы жоспар­лары­мен бөлісіп, еліміздегі ең ықпалды күшке ие партиямен ықпалдастық бай­ла­ныстар одан әрі жалғасын табатынына сені­мін білдірді.  

Назгүл НАЗАРБЕК,

Түркістан облысы