64 жылдық тарихы бар Түркістан облысындағы Ыбырай Алтынсарин атындағы балалар кітапханасы бүгінде ғимаратсыз отыр.
Күйі кеткен кітапхана
283
оқылды

Шымкент қаласынан Түркістанға көшірілген кітапханаға ғимарат болмағандықтан, ондағы 235 мыңнан астам кітап қоры Farab ғылыми-әмбебап кітапханасының жертөлесінде сақталып тұр. Бұл туралы жуырда Farab ғылыми-әмбебап кітапханасының жертөлесінде жатқан кітап қорын көріп қайтқан Парламент Мәжілісінің депутаты Нұрсұлтан Байтілесов айтып, мәселе көтерді.

Депутаттардың өңірлерге сапарлары барысында Түркістан қаласының тұр­ғындарымен кездескен «AMANAT» партиясы фракциясының мүшесі Нұрсұлтан Байтілесов Farab кітапханасының ұжымымен әңгімелесу барысында кітапхана ісі саласындағы мамандардың, заманауи нысандардың жетіс­пеушілігіне және кітапханаларды жаң­ғырту қажеттілігіне назар аударды. Сондай-ақ ол Шымкенттен Түркістанға көшірілген Ыбырай Алтынсарин атындағы балалар кітапханасы туралы мұндай мәдени мұра балаларға қолжетімді болуға тиіс екенін атап өтті.  

«Кітапхананың өз ғимараты болуы керек. Ы. Алтынсарин атындағы балалар кітапханасын орналастыру мәселесі барлық тиісті мемлекеттік орган тарапынан ойлас­тыр­ыл­ған іс-қимыл мен үйлесімді шешімді талап етеді. Кітапхананы көшіру – күрделі процесс. Бұл қадамға Мәдениет және ақпарат министрлігі тарапынан да тиісті назар аударылуы керек. Қолайлы нысан табу мәселесін шешуде де белсенді көзқарас қажет. Бірлескен күш-жігер арқылы әр кітаптың өз оқырманын табуын және балалардың білім беру ресурстарына толық көлемде қол жеткізуін қамтамасыз ете аламыз», – деді депутат. 

«Мемлекет басшысы Қасым-Жомарт Тоқаев балалар әдебиеті мен кітапханаларды қолдау мәселелерін бірнеше рет көтерді. Ол ұлттық мүддеге сай келетін кітаптарды көптеп басып шығарудың маңызына назар аударып, кітапханалар мәдени даму мен білім беру орнына айналуы керек екенін атап өтті. Бұл жерде депутаттық корпустың ғана емес, ең алдымен мемлекеттік орган­дардың міндеті – саланы қаржыландырудың тиісті деңгейін қамтамасыз ету», – деді тағы бірде Нұрсұлтан Байтілесов.

Облыстық мәслихат депутаты Қалыйма Жантөреева да осынша кітап қорының жертөледе жатқанын назарға алып, бірнеше рет жанайқайын білдіріп жүргенін көргенбіз. Мандат иелерінің жанына батқан мәселе бойынша билік өкілдеріне сұрау салдық. Түркістан облыстық Мәдениет басқарма­сының басшысы Әзімхан Қойлыбаевтан  Ыбырай Алтынсарин атындағы кітапхананың бүгінгі жай-күйін сұрадық. Әзімхан Серікұлы 2024 жылдың қазан айына дейін Шымкент қаласында оқырмандарға қызмет көрсетіп келген балалар кітапханасы  бүгінде Түркістан қаласындағы  облыстық Фараб кітапханасының ғимаратында жас оқырман­дарға қызмет көрсетіп келе жатқанын айтады. Кітапхананың жеке ғимараты болмағандықтан, уақытша пайдалану үшін биылғы жылдың ақпан айында Б.Сат­тарханов көшесі №26Б  мекенжайында орналасқан Sirius ғимаратының 2-3 қабатын жалға алу бойынша келісімшарт жұмыстары жүргізіліпті. 

«Бүгінде ғимаратқа көшу жұмыстары жүргізіліп жатыр. 3-10 наурыз аралығында көшу жұмыстары толық аяқталған соң балалар кітапханасы қалыпты жұмыс ре­жим­ін­де оқырмандарға қызмет көр­сететін болады», – дейді басқарма басшы­сы. 

Кітапхана директоры қызметіне был­тырғы 1 қарашада тағайындалған Рыс­бек Летаев дәл қазір кітаптарды  көшіру шара­лары­ның жүріп жатқанын,  дегенмен осы уақытқа дейін 21 қызметкер Farab кітапхана­сының  екінші қабатында отырып оқырман қабылдап, лайықты деңгейде жұмыс іс­те­генін атап өтті. 

«Жалпы кітапханалардың кітап қорлары талапқа сай температурасы сақталған жертөлелерге орналастырылады. Ы. Алтын­сарин атындағы кітапхананың кітап қоры да лайықты температурада сақталды. Сон­дық­тан аса шошынудың қажеті жоқ. Әзір­ге уақытша жалға алып отырмыз. Келешекте кітапхананың өз ғимараты боларына сенім мол. Бұл мәселе облыс басшылығының назарында тұр», – дейді Рысбек Летаев. 

Билік өкілдері осылайша балалар кітап­ханасы әзірге жалға алған ғимаратта отыратынын айтты. Енді жертөледе жатқан кітаптар балаларға қызмет көрсетеді деген сенімдеміз.

Назгүл НАЗАРБЕК,

Түркістан облысы