5 сәуір күні Астанада бокстан орта салмақта IBF және WBO тұжырымдары бойынша әлем чемпионы Жәнібек Әлімханұлы француз боксшысы Анауэль Нгамиссенгемен жұдырықтасады, – деп хабарлады Aikyn.kz сайты.
Бұл кездесудің билеттері дәл бір ай бұрын, яғни 5 наурызда сатылымға шықты. Билеттің ең арзаны 20 мың теңгеден басталып, 255 мың теңгеге дейін жетеді.
Айта кетейік, аталған бокс кешінде Батыр Жүкембаев, Сұлтан Зәуірбек, өзбекстандық Баходир Жалоловтар да жұдырықтасады деп жоспарланған.
5 сәуірде елордада өтетін ірі кәсіпқой бокс кешінің басты жекпе-жегі – Жәнібек Әлімханұлы мен француз Анауэль Нгамиссеннің жұдырықтасуы болмақ. Қазақстандық боксшы алдағы жекпе-жегінде екі бірдей чемпиондық белдігін қорғайды.
Metarating порталының мәліметінше, Жәнібек Әлімханұлының қарсыласы Анауэль Нгамиссенгге соңғы жекпе-жегін 2024 жылдың маусым айында өткізген. Сонда Анауэль Сандро Джажанидзені үшінші раундта техникалық нокаутпен жеңген. Оның қоржынында 14 жеңіс, оның тоғызы – нокаутпен, жеңіліп көрмеген.
Ал Qazaq style деген атпен танымал Әлімханұлы соңғы рет 4 қазанда Аустралияның Сидней қаласында рингке шыққан болатын. Ол жекпе-жекте жаңазеландиялық Андрей Михайловичті техникалық нокаутпен жеңіп, чемпиондық титулды қорғап қалды.