Республикалық спорттық және олимпиадалық даңқ мұражайында 2016 жылдан бері жөндеу жұмыстары жүргізілмеген.
Алматыдағы олимпиадалық даңқ музейі 10 жыл бойы жөндеу көрмеген
Александр Павский
434
оқылды

Әлеуметтік желіде алматылықтар Сейфуллин және Бөгенбай батыр көшелерінің қиылысында орналасқан Республикалық спорттық және олимпиадалық даңқ музейінің жабық тұрғанына шағымданған. Осы мәселені көтерген тілшілер музей қарамағына кіретін Қазақ спорт және туризм академиясына хабарласып, мән-жайды анықтаған, – деп хабарлайды Аikyn.kz.

Kazinform агенттігінің анықтауынша, мұражай келушілер легінің төмендеуіне байланысты, яғни  ЖОО, спорт мектептері, жалпы білім беретін мектептер секілді мекемелерден алдын ала түскен сұраныстарға сәйкес, тек арнайы кесте бойынша жұмыс істейді.

Негізі мұражай ғимараты 1888 жылы тұрғызылған. Ал оны қайта қалпына келтіру бойынша күрделі жөндеу жұмыстары 1988 жылы жүргізілген. Кейін 1999 жылы мұражай Қазақ спорт және туризм академиясының қарамағына өткен. Содан бері ғимараттың сыртқы келбетіне және ішіндегі бөлмелеріне күрделі жөндеу жұмыстары соңғы рет 2016 жылы жасалған.

— Мұражай ғимараты архитектуралық ескерткіштер санатына жататындықтан, біз «Қазқайтажаңғырту» РМК талаптарына сәйкес және осы мекеменің арнайы рұқсатынсыз ғимараттың сыртқы келбетіне күрделі жөндеу жұмыстарын жүргізе алмаймыз. Бірақ біздің мекеменің шаруашылық жұмыстарының жоспарына сәйкес, осы жылдың жаз мезгілінде жеңіл жөндеу жұмыстарын жүргізу жоспарланған, – деп түсіндірді академиядан.

Қазақ спорт және туризм академиясының мәліметінше, мұражайда 700-ден астам жәдігер сақталған. Олардың қатарында: кубок, медаль, грамоталар, дипломдар, сувенирлер, фотосуреттер, әйгілі спортшылардың жеке заттары мен құжаттары, жартасқа салынған ежелгі суреттердің көшірмелері, бүркітшілердің арнайы атрибутикалары сақталған.