Биыл алғаш рет Қазақстан Республикасының Президенті Қасым-Жомарт Тоқаев Төтенше жағдайлар министрлігінің жеті қызметкерін мемлекеттік наградалармен марапаттау туралы Жарлыққа қол қойды.
Президент құтқарушы 7 әйелді мемлекеттік наградамен марапаттады
баспасөз орталығы
335
оқылды

Бұл туралы Төтенше жағдайлар министрлігінің ресми сайты хабарлады. Олардың жазуынша, мұндай айтулы оқиға Қазақстан ТЖМ тарихында алғаш рет болып отыр. Бірден жеті әйел құтқарушы Халықаралық әйелдер күні қарсаңында жоғары мемлекеттік наградалар алды.

Ақордада Мемлекет басшысы Бауыржан Момышұлы атындағы II дәрежелі «Айбын» орденін Кадр және тәрбие жұмысы департаментінің бастығы Анаргүл Аманжолқызы Әбуеваға жеке өзі табыс етіп, оның ерекше еңбегі мен азаматтық қорғау жүйесінің дамуына қосқан үлесін атап өтті. Сонымен қатар Төтенше жағдайлар министрлігінде салтанатты іс-шара өтті, онда ведомство басшысы, генерал-майор Шыңғыс Әрінов Президенттің атынан қызметінде жоғары кәсібилік пен жанқиярлық танытқан қызметкерлерге марапаттар табыс етті. «Құрмет» орденімен азаматтық қорғау органдарының ардагері Сәуле Бопиқызы Қалғанбаева, ТЖМ Медициналық-психологиялық қызмет басқармасының бастығы Светлана Байтасқызы Мұратбекова; Павлодар облысы ТЖД Жоспарлау және жедел басқару орталығының бас маманы Гүлжахан Қабдуаисқызы Окатаева марапатталды.

«Ерен еңбегі үшін» медалімен ТЖМ Имидждік жұмыс және сыртқы коммуникациялар департаментінің директоры Динара Киекбайқызы Нұрғалиева, ТЖМ Стратегиялық жоспарлау және жедел басқару командалық орталығының жедел кезекшісі Алмагүл Шұбартайқызы Ілиясова, ТЖМ Апаттар медицинасы орталығы филиалының дәрігері Назира Ермекқызы Сисибаева марапатталды.