Біз тілге тиек еткен киелі мекен Қызылорда облысына қарасты Жалағаш ауданының Еңбек ауылы. Бұл елді мекеннің еңкейген кәрісінен еңбектеген баласына дейін өте еңбекқор әрі өнерпаз. Олай дейтініміз, киелі мекеннің ақжаулықтылары шаңырақтарын сәбидің шат күлкісіне бөлеп қана қоймай, «Батыр аналар» ансамблін құрып, ауыл аспанын әсем әуендерімен тербетіп жүр.
Қазір ауылда 43 алтын, 54 күміс алқа иегері тұрады екен. Бала бақытына бөленген ауыл аналары ең кемі 9 бала тәрбиелесе, арғысы 18 балаға жарық дүние сыйлап, жапырақ жайған бәйтеректей жайқалып отырған ерекше отбасыны да осы мекеннен табасыз.
Солардың бірі – 18 құрсақ көтерген Фатима анамызға ауыл халқының құрметі айрықша. Тұрмысқа 19 жасында шыққан әзіз ана саналы ғұмырын ауыл шаруашылығы саласына арнады. Ер-азаматқа тән ауыр жұмыстар атқарып, тынымсыз еңбек етті. Бүгінде бейнетінің зейнетін көріп, балаларын аяқтандырып, 63 немере, 26 шөберенің қызығына кенеліп отыр.
Ауылдың өрісін кеңейтуге үлесін қосқан тағы бір батыр ана – Қантай Итенова. Бұл кейіпкеріміз де еңбекке ерте араласып, тағдырдың қилы кезеңдерін бастан өткеріпті. Ауылда жастайынан қара жұмыстың қазанында қайнады. Жұмыстың ауыр-жеңіліне қарамады. Бүгінде еселі еңбегінің өтеуі қайтып, құрмет төрінен көрініп жүр.
«Осы ауылға 1964 жылы келін болып түстім. Содан бері қарай жұмыс талғамай, «екі қолға бір күрек» дегендей, түрлі жұмыс істедім. Лай тасыдым, күріш алқабында тер төктім. Алланың сыйына бөленіп, 12 құрсақ көтердім. Жолдасым екеуміз қанаттыға қақтырмай, тұмсықтыға шоқтырмай, 8 ұл, 4 қызды тәрбиелеп өсірдік. 12 құрсақтан 30-ға жуық немере, 15 шөбере сүйдік. Бүгінде балаларым өз алдына бір-бір отау болып, шама-шарқынша елге қызмет етіп жүр. Отағасым да туған ауылының өркендеуіне өлшеусіз үлесін қосты. Ғұмырының соңына дейін көлік жүргізіп, елге пайдасын тигізді. Алланың жазумен төрт жыл бұрын бақилық болды. Осы орайда айта кетсем, өзім күйбең тірліктің күймесінде жүріп, ауыл аналарының ұйытқы болуымен құрылған «Батыр аналар» ансамблінде солист болып, өнер көрсеттім. Түрлі мерекелік шарада ән шырқап, елдің құрметіне бөлендік. Еселі еңбегімізді ел бағалады. 45 жасымда зейнеткерлікке шығып, ұл-қызымның, немере-шөберемнің қызығына кенеліп отырмын», – дейді алтын құрсақты ана.
Қантай әже қандай қиындық болса да мойынсынбай, адал еңбегінің арқасында балаларын аяқтандырып, ана бақытына бөленіп отырғанын жеткізді. Ұл-қыздарына тәлімді тәрбие беріп, елдің алғысына бөленді.
Қазір батыр ана үш ұлымен бірге тұрады. Үш келін жұмсап, балалары мен немерелеріне аналық та әжелік қамқорлығын танытып келеді. Ел қатарлы тату-тәтті тұрмыс кешіп, ауыл халқына өнегелі отбасы ретінде танылды.
12 балаға өмір сыйлаған әжеміз бүгінде 76 жасқа қарайды. Алтын құрсақты ананың жас ұрпаққа айтар өсиеті көл-дария. Әрбір қазақ келіні тәңірдің тәтті сыйына бөленіп, өлшеулі өмірде ана бақытына кенелуіне тілектестігін білдіріп отырады.
Дәркүл Тоқабаева да ауыл халқына құрметті батыр ана. Жастайынан осы ауылға келін болып түсіп, қара шаңырақтың отын өшірмей, алтын асықтай ұл-қыздарын дүниеге әкелді. Тәңірдің қалауымен 11 құрсақ көтеріп, мәуелі бәйтерекке айналды.
«11 құрсақ көтердім. Жеті қыз, үш ұлды өмірге әкелдім. Балаларымнан 40 немере, 33 шөбере сүйіп отырмын. Балаларымның бәрі қанаттанып, өмірден өз орнын тапты. Тәубе етеміз. Құдай қосқан қосағым 85 жасын еңсерді. Өмір бойы ауылда трактор, комбайн айдап, ауыл шаруашылығының өркендеуіне сүбелі үлесін қосқан еңбек адамы. Өзім де ерте бастан еңбектің қазанында қайнадым. Ұл-қызымызды жеткізсек деп түрлі жұмыс істедім. Бүгінде сол бейнетімнің зейнетін көріп отырған жайым бар. Бала деген өміріңнің жалғасы, тәңірдің берген тәтті сыйы. Сондықтан әрдайым қыздарым мен келіндеріме баланы шектемеңдер деп айтып отырамын», – дейді Дәркүл әже.
Біз пікірлескен асыл аналарымыздың әрбірі «Батыр аналар» ансамблінде өнер көрсеткен. Алғаш құрылған жылдары ансамбльге өнерлі 19 ана қабылданған екен. Алақандай ауылдан құрылған шағын ансамбль уақыт өте келе облыс, республикаға танылып, түрлі сахда өнер көрсетуге мүмкіндік алады. Бүгінде ауылдың жас келіндері өнерлі әжелердің ізін жалғап, ансамбль жұмысын өрге сүйреп келеді.
«Өңір халқы ауылымызды алтын құрсақты аналар қоныстанған құтты мекен санайды. Соның ықпалы болар, ел ағаларының ұйытқы болуымен ауылымыздан шағын аналар ансамблі құрылып, жұмысын бастаған болатын. Нақты айтқанда, ХІХ партия конференциясының қарсаңында партком хатшысы Кеніш Жұмалиева, оқу ісінің үздігі, зейнеткер Орынкүл Балтабаева, совхоз директоры Ұзақ Еспанов, ауылдық аналар кеңесінің төрайымы Балдай Садықова, ауылдық мәдениет үйінің директоры Зоя Сейдуллаевалардың ақылдасуымен ансамбль 19 батыр анадан құрылады. Ең алғаш рет өнерлі аналар сол 1988 жылдың 7 наурызында ауылдық мәдениет үйінде концерт өикізіпті. Содан бері қарай қанша жыл артта қалса да, ансамбль өз жұмысын тоқтатқан жоқ. 2018 жылы ансамбльдің 30 жылдық мерейтойын жоғары деңгейде атап өттік. Қазір алтын құрсақты әжелеріміздің орнын жас келіндер басып, ансамбль құрамында өз өнерлерін көрсетіп жүр. Яғни, бүгінде «Батыр аналар» ансамблінің құрамында 14 жас ана ән шырқайды, – дейді бұл жайында ауылдық мәдениет үйінің әдіскері Бақыт Аяпова.
Жалпы, сәбидің шат күлкісіне бөленген берекелі ауылдың бірлігі бекем. Жыл сайын шілдехана мен тұсаукесер тойы жиі тойланып тұрады. Ең бастысы, бір шаңырақтың астында тұрып жатқан келіндер тату-тәтті тұрмыс кешіп жүр.
Ербақыт ЖАЛҒАСБАЙ,
Қызылорда облысы