Атырауда 74 жастағы таксист әже тұрады.
Әйелмен әлем әдемі
316
оқылды

Иә, бүгінгі кейіпкеріміз ер­ек­­ше адам. Зейнет жасына шық­қанына қарамастан, көлік жүр­гізіп, жолаушыларды тасып, тап­қанын немерелерінің қызы­ғына бөлісіп жүр. Иә, бүгін біз таксист әжей туралы айтпақпыз.

Сәуле Мұсаева – 74 жаста. Зейнет жасына шыққалы такси жүргізуді кәсіп еткен әжей бір қызығы, бірде-бір рет жол ере­же­сін бұзбаған екен. Отыз жыл­дан астам уақыт көлік тізгіндеген кейіпкеріміз  осы кәсіптен күш-қуат алатынын айтты.

Атырау облысындағы Ма­қат – Доссор тасжолында жо­лау­шы тасымалдап жүрген жүр­­гізуші әжей өз уақытында жо­ға­ры білікті маман болған.

Сәуле Мұсаева – Алматы техникалық институтын бітіріп, инженер-технолог мамандығын алған. Ол еңбек жолында инже­нер, экономист, фабрика дирек­торы қызметтерін атқарып, абы­роймен зейнетке шыққан. Ал көлік жүргізуге деген қы­зы­ғу­шылығы бала кезінен басталған. «Алғашқы көлігімді 1998 жылы сатып алған едім. Ол кездегі эмо­циямды айту мүмкін емес. Қатты қуандым. Себебі көлік десе іш­кен асын жерге қоятындардың қатарынанмын. Әрине, 1998 жылдан бері біраз жыл өтті. Сол уақыттан бері бірнеше көлік ауыстырдым. Бастысы менің көлік тізгіндеуіме отбасым қол­дау білдірді. Ешкім шектеу қой­мады. Осындай қолдау мен сый­ластық зейнетке шыққаннан ке­йін таксилікті қолға алуыма себеп болды», – дейді кейіп­ке­ріміз.

Зейнетке шыққан соң Сәуле Мұсаева Мақат ауданындағы көлік жүргізу мектебінде сабақ берген.

«Жолдағы қауіпсіздік – әрбір жүргізушінің жауапкершілігі. Біз жол ережесін сақтау арқылы өзімізді ғана емес, өзгелерді де қорғаймыз. Полиция қызмет­кер­лері әрдайым тәртіпке ша­қырады, өйткені бір сәттік бей­қамдық орны толмас өкінішке әкелуі мүмкін. Жолда абай бо­лу – өзіңді және жақында­рың­ды қорғау қағидасы әр жүр­гізушінің санасында болуы ке­рек», – дейді ол.

Әжейдің айтуынша, көлік жүргізу –  рөлді ұстап, газ басу емес. Бұл – үлкен жауапкершілік. «Кейбір жүргізушілер асығыстық танытып, ережені елемейді. Бі­рақ жолда әр секунд маңызды. Бір қателік орны толмас қайғыға әкелуі мүмкін. Сондықтан мен әрдайым тәртіпті сақтаймын және өзгелерге де осыны кеңес етемін, – дейді ол.

Сәуле Мұсаеваны Мақат ау­дандық полиция бөлімі де құр­меттейтін болып шықты. «Әжей Мақат ауданындағы үлгілі жүр­гізушілердің бірі. Оны жергілікті тұрғындар жақсы таниды, ұқып­тылығы мен сабырлы мінезін жоғары бағалайды. Ол бірде-бір рет жол ережесін бұзған емес. Мұндай тәжірибелі жүргізушілер жастарға үлгі болуы керек», – дейді.

Мақат аудандық полиция бөлімі Жергілікті полиция қыз­­меті басқармасының учас­келік полиция инспекторы по­лиция майоры Сайфолла Капанов.

Ерекше мамандықты таң­да­ған келесі кейіпкеріміз – Атырау қаласының тұрғыны Биғайша Хасанова. Ол – машинист, кран­шы болып еңбек етеді.

30 жылдан астам уақыттан бері осы салада келе жатқан Би­ғайша 4-разрядты маман. Ерек­ше маман иесі осы жолды таң­дауына кезінде әкесінің себепкер болғанын айтады.

«9-сыныптан кейін менде «Қайда барамын?» деген сұрақ болды. Сол кезде әкем өзімді кран­шы ретінде байқап көруге кеңес берді. Осылайша, кран саласына келдім. Алғаш рет Құл­сары қаласындағы құрылыс алаңында еңбек еттім. Сол жерде құрылысы жүріп жатқан бес қа­батты үйлердің құрылыс ала­ңында кранды бірінші рет бас­қардым. Содан бері мен әртүрлі крандармен жұмыс істедім. Мен көтерген ең биік нүкте – шама­мен 80 метр. Шыны керек  өзімді басқа мамандықта елестете ал­маймын», – дейді Биғайша.

 54 жасқа жеткен кейіпкеріміз Атырауда алғаш рет ашылған жүк  вагондарын шығаратын вагон жасау зауытында жұмыс істеп жатыр. Айта кету керек, Атырау вагон жасау зауыты жүк вагондарын, мұнай өнімдерін, сұйытылған газды және өнер­кә­сіптік жүктерді тасымалдауға ар­налған цистерналарды шы­­ғаруға маманданған. Зауыттың то­лық қуатына көшкен кезде  жы­лына 6-7 мың вагонды құрас­тырады деген болжам бар. «Кран тасушылар-өндірістің ма­ңызды буыны. Біз цехтардың үздіксіз жұмыс істеуін және жос­пардың орындалуын қамтамасыз ететін жүктерді жылжытамыз. Краншы ретінде жұмыс істеу үшін дәлдік, төзімділік және ұқып­тылық қажет. Бір қате қоз­ғалыс қалпына келтірілмейтін жағдайға әкелуі мүмкін», – дейді ол.                                                 

Ерекше мамандықтың кәсі­би шебері атанған кейіпкері­міз­дің ендігі мақсаты немерелерін өсіріп, әлем аралау. Ел көріп, жер тану.

Бір қолымен бесікті, бір қо­лымен әлемді тербеткен әйел ана­ларымыздың арасында қо­ғам­ның дамуына қызмет етіп жүр­ген осындай ерекше маман иелері де бар. Мақтанасың, марқаясың...

Баян ЖАНҰЗАҚ,

Атырау облысы