Біз әдетте арулардың жаны гүлдей нәзік деп бағалағанымызбен, шын мәнінде олар кейбір ер азаматтардың қолынан келмейтін ауыр жұмысқа да білек сыбана кірісіп кетеді. 8 наурыз – Халықаралық әйелдер күні мерекесі қарсаңында сондай жандардың бірсыпырасына тоқталғанды жөн көрдік.
Энергоорталықтың гүлі – Гүлнар
Бүгінде еліміздегі барлық салада нәзікжандылар биік белестерді бағындыруда. Солардың бірі – «Таразэнергоорталығы» АҚ-ның суды химиялық жолмен тазалайтын 5-дәрежелі аппаратшысы Гүлнар Жақашева.
Гүлнар Түлембайқызы еңбек жолын 1995 жылы аталмыш мекемеде суды химиялық жолмен тазалайтын 3-дәрежелі аппаратшы болып бастаған. Өзінің шеберлігінің арқасында біліктілігін 5-дәрежеге дейін көтеріп, қызметін абыроймен атқарып келеді.
30 жылға жуық уақытын осы салаға арнаған кейіпкеріміз – жауапкершілігі мол, қабілетті, ұжымда беделді, әріптестерімен тез тіл табысып жұмыс істей алатын, жақсы қасиеттерімен өзгелерге үлгі-өнеге болып жүрген білікті маман.
– Менің жұмысым үнемі ізденісті талап етеді. Технологиялар да күннен-күнге дамып, жаңаша сипатқа ие болы жатқандықтан, соған сай жұмыс істеуге талпынамын. Қазір соның жемісін көріп отырмын, сол үшін еш өкінішім жоқ. Керісінше, туған елімнің гүлденуіне атсалысқаным үшін кеудемді мақтаныш сезімі кернейді, – дейді Гүлнар Түлембайқызы.
Тазалық сақшысы – Зинеп
Біздің алғашқы кейіпкеріміз – Зинеп Жұбатқанова 2014 жылдан бастап «Жасыл ел–Тараз» жауапкершілігі шектеулі серіктестігінде жол тазалығын сақтау учаскесінде қызмет атқарып келеді.
– Ең әуелі «Жасыл ел–Тараз» мекемесінің қаламыздың көркеюі мен дамуы жолында атқарып жатқан жұмыстары орасан зор екенін ерекше атап өткім келеді. Серіктестікте жұмысшыларға барлық жағдай жасалған. Әрине, жұмысымыз жеңіл емес. Күннің ыстық-суығына, ауа райының тосын мінезіне қарамастан, бел жазбай еңбек етеміз. Жұмыс барысында кемшіліктер де кездеседі. Алайда ештеңе істемеген адам ғана қателік жібермейді деп ойлаймын. Бізді көргенде алғыстарын жаудыратын жерлестеріміз де аз емес. Олардың ыстық ықыласын естігенде қанаттанып, жұмысқа деген ынтамыз екі есе арта түседі. Адал еңбекпен тапқан астың дәмі де өзгеше болады. Бастысы, еш жұмысты қиынсынбай, құлшыныспен істесе, жетістігі де мол болмақ. Осы орайда барша әйелдер қауымын мерекелерімен құттықтап, зор денсаулық, мол бақыт тілеймін! – дейді Зинеп Көшербайқызы.
Су шаруашылығының шебері – Любовь
Су – өмір нәрі, тіршілік тірегі. Сусыз өмір жоқ. Мемлекет басшысы Қасым-Жомарт Тоқаев «Әділетті Қазақстанның экономикалық бағдары» атты Жолдауында: «Су ресурсы – еліміздегі өзекті мәселелердің бірі. Әсіресе, судың сапасы және оның халыққа қолжетімді болуы аса маңызды болып тұр. Жыл өткен сайын халқымыздың саны да, экономикамыз да өседі.
Бұл – қалыпты құбылыс», – деген болатын. Сондықтан бұл салада еңбек етіп жүрген қызметкерлердің еңбегі ерен.
Бұл тұрғыда «Жамбыл су» кәсіпорнын ерекше атап өткеніміз абзал. Жарты миллионға жуық тұрғыны бар Тараз қаласындағы су және кәріз жүйесінің 80 пайызы «Жамбыл су» мемлекеттік коммуналдық мекемесінің теңгерімінде. 1952 жылы құрылған кәсіпорын осы мерзімде талай даму мен дағдарысты кезеңдерді бастан өткізді. Осы сындарлы кезеңдерден сүрінбей, мекемеде 40 жылға жуық табан аудармай еңбек етіп келе жатқан Любовь Журавлеваның ерлігі де, өрлігі де бір бөлек.
Любовь Николайқызы 1987 жылы сол кездегі «Горводоканал», қазіргі «Жамбыл су» мекемесінің машинисі болып жұмысқа орналасады. Ал 1989 жылы №1 телім хлорлау қондырғысының операторы болып ауысып, бүгінге дейін осында қызмет етіп келеді.
– Жұмысым өзіме ұнайды. Сондықтан саналы ғұмырымның 40 жылға жуық уақытын су шаруашылығына арнағаныма бір сәтке де өкінген емеспін. Әрине, әр саланың өз қиындығы бар. Дегенмен ұжымның ауызбіршілігі арқасында соның барлығын еңсеріп келеміз. Әсіресе, соңғы бірер жылдың бедерінде «Жамбыл су» мекемесіне айрықша көңіл бөлінуде. Соның нәтижесінде материалдық базамыз жаңа техникалармен, заманауи аппараттармен толығуда. Ел Президенті өз Жолдауында су шаруашылығына екпін түсіруі жұмысымызға тың серпін беріп, жаңа мүмкіндіктерге жол ашып отыр, – дейді Л.Журавлева.
P.S.
Түздің де, үйдің де тірлігін дөңгелетіп, шаруаны ширатып жүрген әйелдер қауымы сонысымен көпке үлгі. Бұрынғының аналары намысын жатқа бермеу үшін қолына қару алып, Отанын қорғаса, бүгінгінің арулары да олардан кем түспей, өңірдің, шаһардың дамуына қомақты үлес қосып келеді. «Әйел – қырық шырақты» деген осы болса керек.
Саятхан САТЫЛҒАН,
Жамбыл облысы