Петропавлда ер адамның көшедегі жұртты қарумен қорқытып жүргенін кездейсоқ әскери қызметкер байқап қалған. Сөйтіп Ішкі істер министрлігінің Ұлттық ұлан офицері бұзақыны ұстап алған.
– “Әскери қызметкер туыстарының үйінен қайтып бара жатқан. Аулада қолына қаруға ұқсас заты бар мас адамды көріп қалған. Ол қолындағы қаруды көшедегі өткен-кеткен адамдарға кезеген. Содан әскери қызметкер дереу бұзақыға қарай беттеген”, – деп мәлімдеді Ұлттық ұлан.
Капитан қоян-қолтық ұрыс әдістерін қолданып, полиция келгенше ер адамды тапжылтпай ұстап тұрған. Кейін бұзақыны ішкі істер қызметкерлеріне тапсырған.