Алматы халықаралық әуежайында болған төтенше жағдайға байланысты үш қылмыстық іс қозғалды, – деп хабарлайды Aikyn.kz сайты.
Polisia.kz мәліметінше, оқиға барысында қолына пышақ ұстаған ер адам әуежай қызметкерін кепілге алып, рюкзагында "бомба" бар деп жолаушыларды қорқытқан.
Оқиғаға байланысты құқық қорғау органдары үш қылмыстық бап бойынша іс қозғады:
- Кепілге алу (ҚР ҚК-нің 261-бабы 2-бөлігі 4-тармағы): 7 жылдан 12 жылға дейінгі мерзімге бас бостандығынан айыру және мүлкін тәркілеу жазасы қарастырылған.
- Қару қолдану арқылы жасалған бұзақылық (ҚР ҚК-нің 293-бабы 3-бөлігі): 3 жылдан 7 жылға дейін бас бостандығынан айыру жазасы көзделген.
- Терроризм актісі туралы көрінеу жалған хабарлау (ҚР ҚК-нің 273-бабы): 5 000 АЕК мөлшерінде айыппұл немесе 5 жылға дейін бас бостандығынан айыру жазасы қарастырылған.
Оқиғаның мән-жайын тексеру үшін жедел-тергеу тобы құрылды. Сот шешімімен күдіктіге қатысты екі айға қамауда ұстау туралы бұлтартпау шарасы санкцияланды.
Сонымен қатар Ішкі істер министрі Ержан Саденовтың тапсырмасымен елдегі әуежайлар мен вокзалдардағы қауіпсіздік жүйесі қайта тексерілуде. Құқық қорғау органдары осындай жағдайлардың алдын алу үшін бақылауды күшейтпек.