Тәуелсіз дін зерттеушісі Тұрарбек Құсайынұлы Рамазан айындағы ораза туралы пікір білдірді, – деп хабарлайды Aikyn.kz сайты. Оның айтуынша, адам ағзасына зиян келтірмейтін, экологиялық таза ораза – протестант-христиандардың ұстанымы.
"Протестанттық ораза ең экологиялық деуге болады, себебі ол икемді, вегетариандық рационды қамтиды, ағзаға зиян келтірмейді (су ішуге рұқсат) және малдың жаппай сойылуына әкелмейді. Сонымен қатар рухани тазалыққа, әлеуметтік жауапкершілікке, экологиялық өмір салтына және ұзақмерзімді оң әсерге бағытталған", – деп жазады зерттеуші.
Дегенмен дінтанушылар мен теологтер бұл пікірмен келіспеуі мүмкін. Ислам ғалымдарының айтуынша, Рамазан оразасының басты мақсаты – тек денсаулыққа пайда тигізу емес, адамның өзін-өзі тәрбиелеуі, сабыр мен шыдамдылықты үйренуі, жаман әдеттерден арылуы.
"Исламдағы ораза таңнан кешке дейін ішіп-жеуден ғана емес, кез келген жаман әдеттен бас тартуды көздейді. Дұрыс ұсталған жағдайда, ол денсаулыққа да пайдалы. Ал протестанттық ораза жеке таңдауға негізделген, сондықтан оны исламдағы оразамен салыстыру дұрыс емес", – дейді дін саласының мамандары.
Айта кетейік, Рамазан айында ораза ұстау – мұсылмандар үшін парыз. Ал протестанттық ораза көбіне саналы түрде өзін-өзі шектеу және рухани жетілу құралы ретінде қолданылады.