Макинск, Қараөзек, Аққайың, Вознесенка, Байсуат, Капитоновка, Иванковка, Журавлевка, Новобратск, Никольское, Алакөл және Боярка ауылдары топан судың астында қалуы мүмкін.
Бұланды ауданындағы 12 елді мекенді су басу қаупі бар
Фото: Автордан
553
оқылды

Ақмола облысында өткен жылы су тасқынының салдарынан төтенше жағдай жарияланған аймақтың бірі – Бұланды ауданында 12 елді мекенге су басу қаупі бар. Су басқан жағдайда ауданда халықты эвакуациялау үшін  сегіз пункт әзірленгені мәлім болды. Бұл туралы Бұланды ауданы әкімінің орынбасары Ораз Смағұлов мәлім етті, – деп хабарлайды Aikyn.kz порталының тілшісі. 

Әкім орынбасарының мәліметінше,  ауданда қазіргі уақытта 12 елді мекенге су басу қаупі бар. Атап айтқанда, Макинск, Қараөзек, Аққайың, Вознесенка, Байсуат, Капитоновка, Иванковка, Журавлевка, Новобратск, Никольское, Алакөл және Боярка ауылдары топан судың астында қалуы мүмкін. 

Қауіптің алдын алу мақсатында аудан әкімдігінің қаулысымен су тасқынына қарсы жедел штаб құрылып, жергілікті бюджеттен 119 миллион теңгеден астам қаражат бөлінген. 

– Бұланды ауданы аумағында екі гидротехникалық құрылым орналасқан. Алайда Иванков тоғанындағы бөген апаттық жағдайда болғандықтан, транзиттік режимге көшірілген. Прохоров-Колоколов бөгенінің де жағдайы қанағаттанарлықсыз күйде. Екі гидротехникалық құрылым да ауылдық округ әкімдіктерінің теңгерімінде тұр, – дейді әкім орынбасары Ораз Смағұлов. 

Деректерге жүгінсек, «Иванков» гидротехникалық құрылымы 1983 жылы салынған. Сыйымдылық көлемі 15 миллион текшені құрайды. Су бөгенін реконструкциялауға жобалық-сметалық құжаттама жасалған. Алайда, ескертулерге байланысты түзету үшін кері қайтарылған. 

– Жоба «Мемлекеттік сараптама» РМК ескертулеріне байланысты қайта өңдеуге қайтарылған. Ескертулерді түзету және сараптамадан өту қорытындыларынан кейін Ақмола облысының Табиғи ресурстар және табиғатты пайдалануды реттеу басқармасымен қаражат бөлуге бюджеттік өтінім берілмек. 2023 жылдың күзінде Иванков транзиттік режимге ауыстырылды. Өткен жылғы су тасқынының салдарынан бөгеннің тереңнен де, енінен де бұзылып, өзеннің табиғи арнасын қабылдады, – дейді әкім орынбасары. 

Ал 1975 жылы пайдалануға берілген «Прохоров-Колоколов» гидротехникалық құрылымының сыйымдылық көлемі 4 миллион текшені құрайды. Бөгенді күрделі жөндеу жобасы жасалып, кешенді ведомстводан тыс сараптамадан оң қорытынды алынған. Жоба құны 340 миллион теңгені құраған. Өткен жылдың 12 тамызынан құрылыс жұмыстары басталған, жұмыс биылғы жылдың қарашасында аяқталуы тиіс болған. Алайда өткен жылдың 1 қазанында тасқын суды қауіпсіз өткізу мақсатында бұру каналы ашылып тасталған. 

Әкім орынбасарының айтуынша, ауданда зардап шеккен халықты жинау үшін сегіз елді мекенде пункт  құрылған. Адамдарды эвакуациялау орындарына 50 кереует пен 50 төсек-орын  әзірленген. Қазір бәрі Макинск қаласындағы мектеп-лицейге орналастырылған. 

Айтарлықтай қауіпті өзен учаскелері мен гидротехникалық құрылымдарда жергілікті атқарушы органдар су деңгейін бақылау үшін гидробекеттер ұйымдастырыпты. 

Абзал АЛПЫСБАЙҰЛЫ, Ақмола облысы

Сараптама, зерттеу мақала, күнделікті өзекті ақпаратты «Айқынның»  Telegram  арнасынан таба аласыз.