«Қазгидромет» РМК БҚО филиалының бүгін таңдағы мәліметі бойынша Жайық өзені Орал қаласындағы гидробекетте бір тәулікте 26 см жоғарылап, 215 сантиметрге (қауіпті шегі 850 см) жеткен, – деп хабарлайды Аikyn.kz сайты.
Жайыққа құятын Шаған өзені Бәйтерек ауданы Чувашин ауылы тұсында 631 см (+88 см, қауіпті шек – 1 280-1 300 см), Орал қаласына жақын орналасқан Мичуринде 274 сантиметрді (+53 см, 1 100 см) көрсетті. Ал Деркөл өзені деңгейі Тасқала ауылында кешегіден 2 см төмендегенімен, Бәйтерек ауданы Зеленый елді мекенінде 359 см (+55 см, 450 см), Белесте 499 сантиметр (+68 см, 600-650 см) болды.
Тасқала ауданында кеше қауіпті шектен (780 см) асып кеткен 2-Шежін өзенінің қарқыны бәсеңдеп, бірден 73 сантиметрге (қазір – 728 см) түскен. Шағын өзендердің ішінде Көпіраңқатының ерекше «тулап» жатқаны байқалады. Мұнда Алғабас ауылы тұсында бір тәулікте 179 см көтеріліп, 384 сантиметрден (қауіпті шегі – 945 см) бір-ақ шыққан.
Еске сала кетейік, «БҚО-дағы ең ірі өзен Жайыққа биыл Ресейден өте мол су келіп жатыр» деген мамандар.