Қазақстан Республикасы Президенті жанындағы Орталық коммуникациялар қызметі мемлекеттік саясат пен қоғамның өзекті мәселелерін талқылайтын подкаст жобасын іске қосты, – деп хабарлайды Aikyn.kz сайты.
Алғашқы қонақ ретінде Ішкі істер министрі Ержан Сәденов шақырылып, елдегі құқықтық тәртіптің маңызы талқыланды. Әңгіме барысында министр қоғамдағы заң мен тәртіп мәдениеті, құқық қорғау органдарының рөлі, сыбайлас жемқорлықпен күрес, киберқылмыс және жол қауіпсіздігі мәселелеріне тоқталды.
Қоғамдық тәртіп – барлығымыздың ортақ міндетіміз
Министр Ержан Сәденов «Заң мен Тәртіп» қағидаты полицияның ғана емес, барлық қоғамның ортақ жауапкершілігі екенін атап өтті.
«Бұл қағидат тек полицияның ғана жұмысы емес. Бүкіл қоғам болып жұмыс істеуіміз керек. Мысалы, әр азамат көшеде немесе көпқабатты үйлерде тыныштық болғанын қалайды. Қазір әр тұрғын үйдің чаттарында учаскелік полицейлер, басқа да жауапты азаматтар бар», – деді министр.
Оның айтуынша, құқықтық мәдениет отбасынан басталады.
«Егер балалар үлкендердің темекі қалдығын тастағанын көретін болса, ол бала осы дұрыс екен деп ойлайды. Егер көшеде кетіп бара жатып, әкесі немесе үлкендері жолды бағдаршамның қызыл шамына өтіп кетсе, оны да бала есінде сақтап қалады. Сол себепті ата-аналар, үйдегі үлкендер мынау жаман, мынау жақсы деп айтып отыруы керек», – деп атап өтті ол.
Жалпы, «Заң мен Тәртіп» қағида туралы Мемлекет басшысы Қасым-Жомарт Тоқаев жақында Бурабайда өткен Ұлттық құрылтайда да:
«Заң мен тәртіп – біздің мызғымас тұғырымыз. Бұл, ең алдымен, еліміздің әр азаматына және барша халқымызға ортақ тәртіп», – деген еді.
«Штрафстан» деген түсінікке қатысты пікір
Қоғамда «Штрафстан» деген түсініктің пайда болуына қатысты сұраққа министр:
– Меніңше, бұлай ережені бұзатындар айтады. Қоғамның бір бөлігі, әрине, түсінеді. Біз бірқатар заңнамалық шара қабылдадық, кейбірі қатаң шығар, бірақ онсыз тәртіп орнату мүмкін емес деп ойлаймын. Ережені бұзбасаңыз, айыппұл салынбайды. Адамдар осыны түсінуі керек. Ал жағымсыз сөзді айтатындар өз мемлекетін, Отанын құрметтемейтін болар. Ол адам өзіне қарап алуы керек. Ол неге бұлай істейді? Тәртіпті бұзбау, түкірмеу дегеніміз – қарапайым ғана нәрсе ғой. Бұл – мәдениет, – деп жауап берді.
Министр полицияның басты мақсаты – адамдарды айыппұлмен қорқыту емес, құқықбұзушылықтардың алдын алу екенін айтты.
«Жалпы, полицияның мақсаты профилактика, заң арқылы қоғамның санасына жеткізе отырып, алдағы уақытта құқықбұзушылықтардың азаюына қол жеткізу екенін атап өткен жөн. Яғни, қоғамның өзі бұлай істеуге болмайтынын түсінуі керек», – деді ол.
Құқық қорғау органдарындағы сыбайлас жемқорлыққа қарсы күрес
Министр «Қылмыс пен полиция – сыйыспайтын ұғымдар» екенін айта отырып, ІІМ ішіндегі сыбайлас жемқорлықпен күрес шаралары туралы сөз қозғады. Ол Қостанайда ІІМ Академиясының тыңдаушысына қатысты тәртіп бұзушылық оқиғасын мысалға келтіріп, «біз заң бұзған қызметкерлерге нөлдік төзімділікпен қараймыз», –деді.
«Полицияның міндеті – қылмыстың алдын алу, ашу, тергеу, яғни қоғамдағы заңдылықты сақтау. Қостанайдағы жағдайға тоқталсақ, бұл тыңдаушының, яғни тәртіп бұзған жүргізушінің болашағы бар еді. Академияда магистратурада оқып жүрсе, осындай әрекетке бармаса, онда өсер еді. Мұндай жағдайларда біз нөлдік төзімділік танытамыз. Тиісінше, ол ішкі істер органдарынан шығарылды. Табандылық танытпаған қызметкерлер де жазаланды», – деді министр.
Киберқылмыс пен интернет-алаяқтыққа қарсы күрес
Киберқылмыстың қарқынды өсуіне байланысты ІІМ арнаулы Киберқылмыспен күрес департаментін құрды.
«2017 жылы құралдар көп болмағанын айта кеткен жөн. Былтыр Киберқылмыспен күрес департаменті ашылды. Бұған дейін бұл мәселемен Криминалдық полиция департаменті айналысқан. Проблемалар көбейіп барады. Өкінішке қарай, қоғамның, азаматтарымыздың қаржылық сауаттылығы төмен. Сеніп қалады. Тез ақша, тез пайда тапқысы келеді. Бүгінде құралдардың бәрі бар. Бұл мәселемен Ішкі істер министрлігі ғана емес, банк те айналысады. Көп заңнамаға өзгерістер енгіздік», – деді министр.
Жол қауіпсіздігі мен автомектептердің жауапкершілігі
Жол қауіпсіздігін сақтау үшін елімізде 25 мыңнан астам бейнебақылау камерасы орнатылған. Министр автомектептердің жауапкершілігіне де ерекше тоқталды.
«Ол адам автомектеп ашамын, оқытамын дегенде өзінің жауапкершілігін түсінуі керек. Автомектептер – жай ғана бизнес емес, жүргізушіні дайындайтын адам. Автокөлік – аса қауіпті көлік құралы», – деді ол.
Туристік полиция бөлімшелері кеңейеді
ІІМ басшысы еліміздегі туристік полиция бөлімшелерінің санын арттыру жоспарланып отырғанын айтты.
«Бізде туристік полиция бөлімі бар. Негізінен үлкен қалаларда, белгілі бір туристік аймақтарда. Ал енді оны барлық өңірде ашамыз. Туристік полиция тек шетелдіктерге ғана арналмаған. Ішкі туризм де бар», – деді Ержан Сәденов.
Министр Е.Сәденовтің айтуынша, «Заң мен Тәртіп» қағидаты әрбір қазақстандықтың күнделікті өмірінің ажырамас бөлігіне айналуға тиіс.
«Бұл – біздің қоғамымызға генетикалық тұрғыдан тән құндылық», – деп сөзін түйіндеді ол.