Зеренді ауданына қарасты Шағалалы ауылында қардың күрт еруінен көпірді су шайып кеткен. Жыл сайын көктемгі су тасқыны кезінде аман қалатын көпірдің күл-талқаны шығып бұзылуы, тұрғындарды аса қатты алаңдатып отыр, – деп хабарлайды Aikyn.kz тілшісі.
Тұрғындардың айтуынша, ауылдың іргесіндегі өзен үстіндегі көпірді жылда жөндеп жамап-жасқағанымен, еш нәтижесі болмаған.
– Жыл сайын жолдар мен көпірді жөндеп жатады. Бірақ ешқандай нәтиже жоқ. Биыл тіпті өзен арнасынан аспайды деген. Жағасы қазылып, көшелердің біріндегі жол да бұзылған. Енді екі бірдей көпір де бұзылды. Осыған дейін су деңгейі қанша көтерілсе де, көпір аман қалатын. Енді ол да жоқ. Адамдар азық-түлігін дайындап та үлгерген жоқ. Балалар мектеп пен балабақшаға қалай бармақ? Бұған кім жауап бермек? Жыл сайын шенеуніктер бірін-бірі кінәлайды. Қарапайым адамдар қайда бармақ? – дейді ашынған ауыл тұрғындары.
Жергілікті ауыл әкімдігі жағдайдың бақылауда екенін айтып, халыққа түсіністік танытуға шақырды.
– Қардың күрт еруінің салдарынан Шағалалы ауылын су басу қаупі туындады. Қазіргі сәтте жанама жол мен көпірге қатысты шешім қабылданды. Жағдай жергілікті атқарушы органдардың бақылауына алынған. Су басудың алдын алу үшін барлық қажетті шаралар қабылданып жатыр. Зеренді ауданының су тасқынына қарсы жедел штабы 8-716-32-21-5-70, 8716-32-21-9-57, – деді Шағалалы ауылдық округі әкімдігінен.
Абзал АЛПЫСБАЙҰЛЫ,
Ақмола облысы
Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.