Ағайынды боксшылар Махмұд пен Төрехан Сабырханның 5 сәуірде Астанада өтетін кәсіпқой бокс кешінде өнер көрсететіні бұған дейін айтылған болатын, – деп хабарлайды Аikyn.kz.
Екеуінің де қарсыласы енді ғана белгілі болды, – деп жазады Qsport.kz.
Махмұд Сабырхан колумбиялық Николас Тордесильямен жұдырықтасатын болды. Қарсыласы да кәсіпқой боксты жаңа бастаған спортшы. Екі жекпе-жек өткізіп, екеуінде де жеңіске жеткен.
Ал Төрехан Сабырхан 29 жастағы Джири Хаукемен жұдырықтасады. Қарсыласы осыған дейін 10 кездесу өткізіп, 4-де ғана жеңіске жеткен.
Жекпе-жек 6 раундқа жоспарланған, әр раунд 3 минуттан.
Айта кетейік, Астанадағы бокс кешінің басты жекпе-жегінде Жәнібек Әлімханұлы (16-0) француз Анауэль Нгамиссенгумен (14-0) жұдырықтасады.
Бұған дейін Махмұд Сабырханның филиппиндік боксшымен жұдырықтасатыны жарнамаланған еді. Алайда ұйымдастырушылар соңғы сәтте қарсыластың ауысатынын айтты. Сонымен қатар осы кеште өнер көрсететін Балауса Мұздыманның да әуелде келісілген қарсыласы келмейтін болды.
Сараптама, зерттеу мақала, күнделікті өзекті ақпаратты «Айқынның» Telegram арнасынан таба аласыз.