Президент Қасым-Жомарт Тоқаев «Әділетті Қазақстан: заң мен тәртіп, экономикалық өсу, қоғамдық оптимизм» атты Жолдауында атап өткен басым бағыттардың бірі ішкі туристік және логистикалық маршруттарды дамыту болатын. Туристік тартымдылығы жоғары өңірлерде әуежайлар салу – олардың әлеуетін дамыту мен инвестициялық тартымдылығын арттыруға жасалған үлкен қадам. Бұған дейін Мемлекет басшысы Шығыс Қазақстан облысының Зайсан және Қатонқарағай аудандарында әуежайлар салуды тапсырған болатын. Шығыс Қазақстанда салынып жатқан әуежай құрылысымен жұмыс сапары барысында Көлік министрі Марат Қарабаев танысты, – деп хабарлайды Аikyn.kz облыстық әкімдікке сілтеме жасап.
Қазіргі уақытта жобалық-сметалық құжаттама дайындалып, білікті мердігер ұйымдар тартылды. Құрылыс-монтаж жұмыстары 2025 жылдың мамыр айында басталып, желтоқсан айында аяқталады деп жоспарлануда. Жоба «Қазаэронавигация» РМК қаражаты есебінен қаржыландырылып, жол және инженерлік инфрақұрылыммен қамтамасыз етіледі. Атап өту керек, құрылыс жұмыстары кезеңінде-ақ жаңа әуежайлар жұмыс орындарын ашу, жергілікті өндіріс материалдарын пайдалану, қазақстандық құрамды ұлғайту сияқты экономикалық әсер береді. Өңірде ұшу-қону жолақтары мен әуе айлағы инфрақұрылымының басқа да элементтерін салу және қайта жаңарту бойынша тәжірибесі мол компаниялар бар.
Өңір басшысы Нұрымбет Сақтағановтың айтуынша, екі әуежайдың салынуы туризм мен экономиканың басқа салаларының дамуына үлкен мүмкіндіктер ашады. Жаңа әуе айлағы көліктік-логистикалық хабқа айналып, бірден бірнеше ауданды облыс орталығымен байланыстырады. Бұл жүк және жолаушылар тасымалының тұрақтылығын қамтамасыз етіп, тауар айналымын арттырады, жергілікті бизнесті дамытып, экономиканың өсуі мен халықтың өмір сапасының жақсаруына ықпал етеді.
– Жаңа жұмыс орындары ашылып, әуежай туристер ағынын арттырады. Бұл елімізден ғана емес, шетелден де туристерді тартуға мүмкіндік береді. Осылайша, жаңа туристік брендтерді дамытуға жол ашылады. Зайсан ауданы – Қазақстанның қақпасы, ал Қатонқарағай ауданы – пантоемдеу және дәстүрлі қазақ медицинасы дамыған өңір. Мұнда қонақүйлер, атпен серуендеу, дәстүрлі ауыл тағамдары ұсынылатын агротуризм қарқын алуда. Бұдан бөлек, мұнда тау шаңғысы курортын да құруға болады, өйткені әуежай жабық жолдар сияқты қолайсыздықтарды жояды, ал заманауи жабдық кез келген дерлік ауа райы жағдайында рейстерді қабылдауға мүмкіндік береді, – деді Нұрымбет Сақтағанов.
Қатонқарағай ауданында әуежай Белқарағай мен Өрнек ауылдарының арасында, «Өскемен-Рахман қайнары» автожолы маңында салынады. Қатонқарағай ауылынан 25 шақырым, Үлкен Нарын ауылынан 62 шақырым қашықтықта орналасады. Ал Зайсан ауданында әуежай бұрынғы Сатпай әскери аэродромының орнында, «Омбы-Майқапшағай» тасжолына жақын жерде салынады. Ол Зайсан қаласынан 25 шақырым, Ақжар ауылынан 85 шақырым қашықтықта орналасады.
– Келесі туристік маусымға дейін Зайсан және Қатонқарағай аудандарындағы әуежайлар алғашқы рейстерді қабылдауға дайын болуы тиіс, – деді ҚР Көлік министрі Марат Қарабаев.
Құрылыстың бастапқы кезеңінде әуежайларда ұзындығы 2 200 метр, ені 45 метр ұшу-қону жолақтары салынады. Бұл Q400, ATR 42/72, CRJ200 ұшақтарын қабылдауға мүмкіндік береді. Осылайша, Шығыс Қазақстанда Қатонқарағай, Зайсан, Тарбағатай аудандары мен Үлкен Нарын аймағы әуеқатынасымен қамтылады. Астана, Алматы, Өскемен және Семейге ішкі рейстер, сондай-ақ Қытай мен Ресейге халықаралық бағыттар ашу жоспарлануда. Бұл тек Қатонқарағай ғана емес, жақын маңдағы аудандарға да экономикалық әсерін тигізеді.
– Саратовка колледжінде келесі оқу жылынан бастап авиация саласы бойынша мамандарды даярлау басталады. Олар тәжірибеден Шығыс Қазақстандағы тікұшақ отряды базасында өтеді. Біздің міндетіміз – жаңа әуежайларды жоғары білікті кадрлармен қамтамасыз ету, – деп атап өтті өңір басшысы Нұрымбет Сақтағанов.