Қарағанды облысына қарасты Теміртау қаласында жалғызбасты қарияға әлімжеттік көрсеткен жасөспірімдер ұсталды, – деп хабарлайды Aikyn.kz Almaty.tv-ге сілтеме жасап.
Бұған дейін жасөспірімдердің жалғыз тұратын ақсақалды аяусыз ұрып жатқан сәттегі видеосы әлеуметтік желіде тараған болатын.
Көршілерінің айтуынша, азаматтар өздерін «электрикпіз» деп таныстырған. Артынша қарияны сөзге иландырып, оған есікті ашқызған. Мәлім болғандай, бұзақылардан қорлық көрген зейнеткер 67 жаста екен. Бұзақылар оны әжуалап, мазақ қылған. Ал жергілікті Полиция департаменті аталған факті бойынша қылмыстық іс қозғалғанын жеткізді.
«Барлық кінәлі тұлғалар, соның ішінде кәмелетке толмағандар ұсталып, уақытша ұстау изоляторына қамалды. Кәмелетке толмағандардың заңды тұлғалары бала тәрбиесіне тиісті деңгейде қарамағаны үшін жауапкершілікке тартылады. Жасөспірімдер профилактикалық есепке алынды. Қылмыстық істі тергеу Қарағанды облысы Полиция департаменті басшылығының қатаң бақылауына алынды», – деді Полиция департаментінің баспасөз хатшысы Бақытжан Құдияров.
Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.