Сенат Төрағасының орынбасары Ольга Перепечинаның төрағалық етуімен «Экономиканы мемлекеттік қаржыландырудан жеке қаржы институттарының қаржыландыруына баса назар аудару» тақырыбы бойынша Үкімет сағаты өтті, – деп хабарлайды Aikyn.kz.
Ольга Перепечина отырысты аша келіп, экономиканың бюджет қаржысына тәуелді болуын төмендетуге мүмкіндік беретін жеке инвестицияға қолайлы жағдай жасау маңызды басымдық екенін атап өтті. Ол құқықтық реформалар мен салықтық ынталандыру және қаржы құралдарын дамытуды қамтитын кешенді тәсіл қажеттігін жеткізді.
«Экономикалық өсуді қамтамасыз ету үшін инвестиция көлемін ұлғайтумен қатар, нарықтық тетіктер есебінен тұрақты қаржыландыру жүйесін қалыптастыру қажет. Жеке қаржы институттары экономиканың нақты секторына белсенді түрде инвестиция салатын жағдай жасау маңызды», – деді Ольга Перепечина.
Сенаттың Қаржы және бюджет комитетінің төрағасы Сұлтанбек Мәкежанов өз кезегінде кәсіпкерлікті қолдаудың жаңа шараларын іске асыру маңызды екеніне тоқталды. 2024 жылы субсидиядан шағын және орта бизнестің несиесіне кепілдік беруге кезең-кезеңімен көшу басталды, бұл бюджетке түсетін жүктемені азайтуы және кәсіпкерлердің қаржы дербестігін арттыруы тиіс. Сонымен қатар Премьер-Министрдің орынбасары – Ұлттық экономика министрі Серік Жұманғарин депутаттарға «Бәйтерек» холдингі капиталын жыл сайын 1 трлн теңгеге ұлғайту жоспары туралы хабардар етті. Ол 8 трлн теңгеге дейінгі сомаға несие мен кепілдік беруге мүмкіндік туғызады. Сондай-ақ шағын және ірі бизнес үшін жаңа несиеге кепілдік беру қорларын құру туралы ақпарат айтылды.
Қатысушылар отырыс қорытындысы бойынша ұсынылған шаралардың маңызына тоқталып, олардың тиімділігіне сенім білдірді. Талқылау аясында Қаржы нарығын реттеу және дамыту агенттігі төрағасының бірінші орынбасары Нұрлан Әбдірахманов, «Бәйтерек» ҰБХ» АҚ Басқарма төрағасы Рустам Қарағойшин, сондай-ақ «Қазақстан Халық Банкі» АҚ Басқарма төрағасының орынбасары Дәурен Сартаев сөз сөйледі. Олар экономиканың нақты секторын қаржыландырудың келешек бағыттары туралы өз ойларын ортаға салып, мемлекеттік және жеке қаржы институттарының өзара іс-қимылының ықтимал тетіктерін талқылады.