Осыған орай, елордада 2-4 сәуір күндері Еркеғали Рахмадиев атындағы Мемлекеттік академиялық филармониясы өнер тарланының ғасыртойына арналған «Құстар әні» атты республикалық фестивалін өткізеді.
Фестивальдің мақсаты – көрнекті композитордың шығармашылық мұрасын кеңінен насихаттау, ұлттық музыка өнерін дамытуға үлес қосу, қазақ музыкасына тағзым көрсету, ұлттық өнерімізді ұлықтау және жас музыкант қолдау көрсету және өңірлік өнер ұжымдарының тәжірибе алмасуына мүмкіндік жасау.
Қазақ даласын күмбірлі күйімен тербеген дәулескер күйші, сайыпқыран сазгердің шығармашылығын кеңінен насихаттауды мақсат еткен мәдени іс-шараға өнер қайраткерлері, мәдениет майталмандары және еліміздің әр өңірінен келетін шығармашылық ұжымдар, БАҚ өкілдері мен өнерсүйер қауым қатысады. Бұл күндері Нұрғиса Тілендиевтің шығармашылығына арналған дөңгелек үстел ұйымдастырылып, онда аңыз тұлғаның туындылары талқыланады.
«Ұлы композитордың мәңгілік мұрасы – қазақ музыкасының алтын қазынасы. Оның күмбірлі сазы дархан даланың рухын тербеп, ұрпақтан-ұрпаққа жалғасады. Бұл іс-шара – сол асыл мұраны дәріптеп, ұлттық өнеріміздің мерейін үстем ететін ерекше рухани кеш», – дейді ұйымдастырушылар.
2 сәуір күні фестиваль аясында дөңгелек үстел отырысы, «Қызыл кілем» салтанаты және фестивальдің ашылуы өтеді. 3 сәуірде өңірлердегі филармония ұжымдарының концерті, ал 4 сәуірде фестивальдің жабылу салтанаты ұйымдастырылады.
Белгілі композитор 500-ден астам музыкалық төл туындының авторы. 50-ден астам драмалық қойылымға,19 көркем фильмге, 17 мультипликациялық фильмге, 14 деректі-хроникалық фильмге музыка жазды. Айта кетейік, республикалық фестиваль аясында Нұрғиса Тілендиевтің қазақ музыкасының алтын қорына енген «Құстар әні», «Өз елім», «Аққу», «Ата толғауы», «Жан сәулем» және басқа да шығармалары орындалады.
Сымбат БАУЫРЖАНҚЫЗЫ