Отандасымыз Михаил Шайдоров Сеулде өткен төрт құрлық чемпионатындағы әсерлі жеңісі мен 2025 жылғы Азия ойындарының қола медалінен кейін көпшілікке үлкен үміт сыйлаған еді. Үміт ақталды. мұздағы өреніміз әлем чемпионатының күміс жүлдегері атанды. Әр елдің дүлдүлдері жиналған мұз айдынында үздіктердің қатарынан көрініп, тарихи жеңісіне қол жеткізді. Бұл – осыдан он жыл бұрын Денис Тен жеткен биік еді. Араға он жыл салып, Шайдоров сол тарихты қайталады.
Күміс медальдің жолы
Михаил Шайдоровтың мансаптық жолы Алматыдағы сауда орталығында басталған екен. Оның бірінші бапкері әкесі Станислав Шайдоров болды. Станислав Шайдоровта өз заманының белгілі спортшысы болған. Қазақстан құрамасының атынан бірталай жарыстың шымылдығын ашқан көреген ардагер десек артық емес. Станислав та кезінде Денис Тенді де жаттықтырып, дайындаған көрінеді. 2018 жылдан бастап Михаил ресейлік маман Алексей Урмановтың қоластында жаттығып келеді. Еске сала кетсек, Алексей Урманов – мәнерлеп сырғанаудан 1994 жылғы олимпиада чемпионы. Михаилдың мұздағы жолының маңызды кезеңі жастар арасындағы әлем чемпионатынан басталды десек болады. Өйткені сол кезде көрерменнің ыстық ықыласына бөленіп, жарысты 2-орынмен аяқтаған еді. Келесі жылы 2023-те Михаил әлем чемпионатында алғаш рет бағын сынап көргенімен, тәжірибенің аздығынан жарысты 14-орынмен аяқтаған еді. Енді араға 2 жыл салып, Шайдоров көрсеткішін жаңа белеске көтерді.
Сайысқа оралсақ, отандасымыз қысқа бағдарламада 94,77 ұпай жинап, аралық үшінші орынға тұрақтаған еді. Бұл сайыста америкалық Илья Малининнің (110,41 ұпай) бағы жанса, жапониялық Юма Кагияма 107,09 ұпай екінші орынға жайғасқан еді.
Сайыстың тағдыры еркін бағдарламада шешілді. Шайдоров бар күш-жігерін жинап, мансабындағы ең үздік көрсеткішті тіркеді. Ол төрешілердің шешімімен 192,70 ұпай жинап, жалпы есепте 287,47 ұпаймен күміс жүлдеге ие болды.
Шайдоровтың тарихи жеңісінде үлкен еңбек жатыр. Неге десеңіз, ол еркін бағдарламада барлық элемент үшін оң бонустар алды. Михаил секіруден бес ультра-си, яғни қиындығы жоғары, оның ішінде төрттік лутц, квад-тулуп каскадын секіруді мінсіз орындады. Атап айтқанда, Шайдоров ресми жарыста үштік аксель мен төрттік тулуп комбинациясын таза орындаған бірінші спортшы атанды.
Әлем чемпионатының алтын медалін 318,56 ұпаймен қатарынан екінші рет америкалық Илья Малинин жеңіп алды. Ал жапониялық Юма Кагияма үздік үштікті 278,19 ұпаймен қорытындылады.
– Мен өз көзіме сене алмай тұрмын. Коньки тебуге шыққанда медаль туралы ойлаған жоқпын. Осы әдемі аренада мүмкіндігінше жақсы сырғанап, барлық эмоциядан ләззат алғым келді. Оған бар күшімді салғым келді. Маусымды осылай аяқтаймын деп еш ойламап едім. Маусым басында әлем чемпионатында жеңіс тұғырынан көрінетініме ешқашан сенбес едім. Бұл ұзақ және қиын маусым болды, сонымен қатар серпінді маусым болды, енді тек алға жылжу керек, – деп айтты Михаил Шайдоров жарысты қорытындылап.
Мәнерлеп сырғанаушы 2026 жылғы Олимпиада ойындарына қатысу нормативін толық орындады. Ол үшін спортшы әлем чемпионатында үздік 24 спортшының қатарына енуі қажет болатын.
Белді қарсыластар
Жарыстың алдында сарапшылардың пікірінше, ерлер арасындағы жекелей сырғанауда басты фаворит америкалық Илья Малинин болған еді. «Төрттіктің королі» атанған ол бірнеше маусым бойы көшбасшылықты ешкімге бермей келді және осы әлем чемпионатында жеңіс тұғырынан көрінгісі келетіні анық білінді.
Малинин бағдарламасына жеті төрттік секіруді, соның ішінде әлемде тек өзі орындайтын төрттік аксельді қосу жоспарын қарастырған еді. Соңғы сұхбаттарының бірінде Илья бұл шешімді жарыс алдында мұздың жағдайы мен өзінің көңіл күйіне байланысты қабылдайтынын айтқан болатын. Оның еркін бағдарламадағы өнері әлем чемпионатының ең жарқын сәттерінің бірі болды. Осылайша, ол қатарынан екі дүркін әлем чемпионы болды.
Шайдоровтың негізгі бәсекелестерінің арасында жапондық Юма Кагияма да болды. Ол олимпиада ойындарының екі дүркін жүлдегері. Кагияма Малининмен арадағы алшақтықты азайту үшін белсенді жұмыс атқарса да, әзірге оған жақындай алмады. Тіпті, Юма және бүкіл Жапония құрамасы бұл маусымды сәтті бастай алмады. Көптеген қателік жіберілді. Әсіресе, ол Азия ойындарында керемет қысқа бағдарламадан кейін артықшылығын жоғалтып, тек екінші орынмен шектелді.
Юма төрт құрлық чемпионатына қатысқан жоқ. Бәлкім, Жапония құрамасының көшбасшыларына қателіктерді түзету және әлем чемпионатына дайындалу үшін уақыт берілген болар. Бұл жарыста егер ол таза сырғанаса, жүлделі орынға кепілдік бар.
Қазақстандық мәнерлеп сырғанаушы Софья Самоделкина АҚШ-тың Бостон қаласында өтіп жатқан әлем чемпионатындағы өнерін сәтті аяқтады. Ол еркін бағдарламада 117,78 ұпай жинап, жалпы сомасы – 181,36 ұпайды қанағат тұтты. Нәтижесінде, жарысты 14-орынмен аяқтады.
Софья Самоделкина соңғы жарыстарда таза сырғанауда. Бірақ әзірге оған қажетті ұпайларды жинау үшін күрделілік жетіспейді. Ол Бостонда жүлде үшін күреседі деп болжау қиын болғанмен, көшбасшыларға бәсекелестік көрсете алды.
Жеңісті америкалық Алиса Лью 222,97 ұпаймен жұлып алды. Екінші орынға жапондық Каори Сакамото (217,98 ұпай) тұрақтаса, үздік үштікті тағы бір жапондық спортшы Монэ Тиба (215,24 ұпай) қорытындылады.
Айта кетейік, Софья Самоделкина 2026 жылғы олимпиада ойындарына қатысу нормативін орындады. Ол үшін спортшы әлем чемпионатында топ-24 қатарына енуі қажет еді. Бұл көрсеткіштің ресми түрде расталуы кейінірек жарияланады.
Әсет ҚАЛИ