CNBC телеарнасының хабарламасына сүйенген Aikyn.kz робототехникадағы бәсекелестіктің себептерін талдайды.
Қытай электрлі көліктер шығаруда қалай әлемдік көшбасшы болса, робот шығаруда да сондай табысқа жетуді көздеп отыр. Гуманоидтар – жасанды интеллектпен жабдықталған, сыртқы түрі мен қозғалысы адамға ұқсайтын машиналар. Олар өнеркәсіптен бастап адамға қызмет көрсету саласына дейін кең қолданылуы мүмкін.
Nvidia бас директоры Дженсен Хуанг жақында «әмбебап робототехника дәуірі» басталғанын жариялап, компанияның гуманоид роботтар жасауға арналған жаңа технологиялық портфелімен таныстырды.
Tesla-ның Optimus атты роботы – АҚШ-тағы ең үздік модель саналады. Илон Маск биыл 5000 дана робот өндіруді жоспарлап отыр. Бұл жоспар Маскты АҚШ-тың басқа стартаптарынан – Apptronik пен Boston Dynamics-тен озып шығуға көмектесуі мүмкін. Бірақ оған Қытай сияқты мықты қарсыласпен айқасуға тура келеді.
«Қытайдың электромобиль индустриясындағы сияқты, гуманоид роботтар саласында да төңкеріс жасайтын әлеуеті бар. Бірақ бұл жолы әсер тек бір саламен шектелмей, тұтас еңбек нарығын өзгертеді», – дейді SemiAnalysis компаниясының талдаушысы Рейк Кнухтсен.
Morgan Stanley ақпан айындағы есебінде қолдану саласына байланысты гуманоид роботтардың құны 10 000-нан 300 000 АҚШ долларына дейін болуы мүмкін деп болжайды. Алайда қытайлық компаниялар арзан әрі тиімді өндіріс көлемінің арқасында АҚШ-ты баға бойынша басып озды.
Қаңтар айында Unitree компаниясы робототехника саласында нағыз сенсация жасады. Оның он алты H1 гуманоид роботы Ай күнтізбесі бойынша Жаңа жылды қарсы алу құрметіне ұйымдастырылған көрсетілімдік бидің құрамында өнер көрсетті. Бұл шоу ұлттық теледидардан тікелей эфирде беріліп, Қытайда үлкен қызығушылық тудырды.
Aikyn.kz осы Unitree компаниясының G1 роботы туралы «Америкада робот адамға қарсы шығып, тапанша кезенген (видео)» атты материалда жазды.
Сарапшылар Қытайдың робототехника саласында әлдеқайда озып кеткенін мойындауда. Morgan Stanley компаниясы ақпан айындағы зерттеуінде соңғы бес жылда «гуманоид» сөзі кездесетін патенттік өтінімдер бойынша Қытай әлемде бірінші орында екенін жариялады. Қытай – 5688 патент, ал АҚШ – 1483 патент тіркелген.
Xiaomi сияқты технология алыбынан бастап, BYD, Chery, Xpeng сияқты электромобиль өндірушілері – бәрі де гуманоид роботтар жасаумен айналысады.
«Біздің зерттеулер Қытайдың гуманоидтық робототехникада ең әсерлі ілгерілеуді көрсетіп отырғанын дәлелдейді. Бұл стартаптардың табысты болуының себебі: ойластырылған жеткізу тізбектері, өндіріске енгізу мүмкіндіктері мен үкіметтің мықты қолдауы», – делінген Morgan Stanley жазбасында.
2023 жылы Қытайдың Өнеркәсіп және ақпараттық технологиялар министрлігі робот өндірісін қолдайтын нұсқаулықтар шығарды. Онда 2025 жылға дейін жаппай өндірісті бастау міндеті қойылған. BofA Global Research сарапшысы Мин Сюнь Ли:
«Қытай гуманоид роботтарды болашақта туындайтын жұмыс күшінің тапшылығын жеңілдетудің жолы ретінде қарастырады. Алдағы 3-4 жылда олар зауыт желілерінде адам еңбегін алмастырады, кейінірек қызмет көрсету саласына да енеді», – дейді.
Жұмыс табу – қазірдің өзінде үлкен проблема. Болашақта гуманоидтар оны одан әрі күрделендіріп жібереді. Мына әзіл видео өзіңе ұнайтын жұмысқа тұрудың қиындығы туралы:
SemiAnalysis компаниясы: «Unitree G1 – қазіргі таңда нарықтағы жұмысқа жарамды жалғыз гуманоидтық робот. Оның құрамында бірде-бір америкалық компонент жоқ. Қытай интеллектуалдық робототехниканы, соның ішінде гуманоид роботтарды экономикалық пайдаға айналдыра алатын жалғыз ел болып отыр. Бұл АҚШ үшін қауіпті – өйткені ол барлық бағытта ұтылып жатыр», – деген мәлімдеме таратты.
Сарапшылардың ойынша, АҚШ тез арада мықты өндірістік базаны жандандырып, Tesla және басқа да компаниялар үшін қажет компоненттерді Қытайдан емес, «friendshoring» (одақтастармен бірлесіп шығару – авт. ) әдісі бойынша басқа елдерден тасымалдауы керек.
Bank of America сарапшыларының есебі бойынша 2030 жылға дейін әлем бойынша жыл сайын 1 миллион гуманоид робот сатылатын болады. Ал 2060 жылға қарай әлемде 3 миллиард робот жұмыс істейтін болады.
Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.