Атап айтар болсақ, Дастан Сәтпаев сынды талантты ойыншының жұлдызы жанған лига биыл ауқымын кеңейткен. QJ лиганың үшінші маусымында еліміздің 18 аймағынан 54 команда бақ сынайды. Турнирге үш жаңа команда қосылды: футболдан U16 Қазақстан құрамасы, «Хан Тәңірі» және «Жеңіс» клубтары.
Жарыстың ең басты жаңалықтарының бірі – әйелдер лигасының ашылуы. Биылдан бастап енді қыздар да турнирде доп тебе алады. Әзірге, 8 командаға мүмкіндік берілген.
«Біз еліміздегі әйелдер футболының танымалдығын арттырып, жанкүйер назарын аударып, қыздарымыздың талантын ашу үшін қолдан келгеннің бәрін жасаймыз. Әсіресе, халықаралық деңгейді көтеруге де ерекше назар аударамыз», - дейді лиганың бастауында тұрған кәсіпкер Тимур Турлов.
QJ лига турнирінің екі маусымы да қорытындыланды. Бүгінде лигадан түлеп ұшқан 226 ойыншы ел чемпионатының жоғарғы лигаларында бақ сынап жүр.
Одан бөлек, биыл екі ірі жоба бастау алмақ. Дарынды футболшылар мен бапкерлерге жыл бойы жеке қолдау көрсетіп, олардың әлеуетін толық ашуға көмектесу мақсатында «Болашақтың ойыншысы» және «Болашақтың бапкері» жобалары жүзеге асырылады. Сондай-ақ, жаттығу жүйесін бейнесараптама арқылы бақылауға бағытталған «ақылды камералардың» арқасындаа статистиканы жинап, өңдеу бұрынғыдан да жақсара түспек.
Осы жүйенің арқасында әйгілі Transfermarket сынды алпауыттар қазақ ойыншыларының стастистикан қадағалап, талантты ойыншыларды табуда.
QJ лига турнирінің биылғы маусымы 19 сәуірде басталады. Ал 23 тамыз күні All Star матчы өтіп, қазақ футболшылары әйгілі мадридтік «Атлетико» тәрбиеленушілеріне қарсы ойнайды. Бұл матч Алматыда өтеді деп жоспарлануда.