Университет кампусы әп-сәтте киіз үйлері, алтыбақандары, ойындары мен мерекелік дастарқаны бар үлкен дәстүрлі ауылға айналды.
Көктемгі фестиваль салтанатты концертпен басталды: NU оркестрі мен NU қоры көрермендерді дала музыкасымен таныстырып, «Қазағым-ай», «Ата толғауы», «Сәлем саған, туған ел» секілді шығармаларды орындады. NU президенті, доктор Вакар Ахмад ұжымды құттықтап, Наурыз мейрамы жаңарудың, береке мен бірліктің мерекесі екенін атап өтті:
«Бұл ерекше мереке ұлы елдің бай мәдени мұрасы мен дәстүрін көрсетеді, үмітті, келісімді және жаңа бастамаларды бейнелейді. Табиғаттың оянуымен көктем бізді дамуға, білімге, жаңалыққа ұмтылуға шабыттандырады. NU-да біз ынтымақтастық пен прогресс рухын бағалаймыз. Наурыз мейрамы әрқайсыңызға жаңа мүмкіндіктер, табыс пен береке әкеліп, қоғамымызды жарқын болашақ жолында нығайта берсін!», – деді ол.
NU вице-президенті Қадиша Даирова биыл аталып өтілетін ұлы Абайдың 180 жылдығы, сондай-ақ қысқа уақыт мерзімінде Орталық Азиядағы жетекші университетке айналған ЖОО-ның 15 жылдығы тойланатыны туралы айтты. Университет студенттерді кәсіби өмірге дайындауда Абайдың «Толық адам» тұжырымдамасын басшылыққа алады. Тұжырымдама адамды тек ақылды және батыл болуға ғана емес, сонымен қатар мейірімді және әділетті болуға үйретеді.
Кампуста NU мектептері және National Laboratory Astana «Ақ ниет ауылы», «Бақыт ауылы», «Береке ауылы», «Бірлік ауылы» және басқа да шағын тақырыптық ауылдар ұйымдастырды. Киіз үйлерде қонақтар бауырсақ, жент, палау, наурыз көжеге тойып, қолөнершілердің өнерін тамашалап, зергерлік бұйымдар сатып алып, қазақтың дәстүрлі ойындарына қатысты.