Қазақстандық балуан Жәмила Бақбергенова әйелдер күресі бойынша әлемдік рейтингте көш бастады. «Біріккен күрес әлемі» (UWW) жариялаған мәліметке сәйкес, ол жапон спортшысы Ами Ишидыны артқа тастап, бірінші орынға шықты, - деп хабарлайды Aikyn.kz 1bol.kz-ке сілтеме жасап.
Жәмила жуырда өткен Азия чемпионатында алтын медаль иеленіп, бұл турнирде төртінші мәрте жеңіс тұғырынан көрінген болатын. Осы нәтижесі үшін ол 10 000 ұпай жинады.
Айта кету керек, бұл — Бақбергенованың биылғы маусымдағы төртінші жарысы және барлығында да отандасымыз жеңіс тұғырынан көрініп отыр.
Бүгінде оның еншісінде әлем чемпионатының 4 күміс және 1 қола медалі бар. Сонымен қатар ол Азия чемпионатының төрт дүркін жеңімпазы және Азия ойындарының күміс жүлдегері.
Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.