Өндіріс елді мекенінің тұрғыны Жұмабаев Әкімбай ақсақал биыл 102 жасқа жетіп отыр. Майданға 1942 жылы алынып, соғыстың ең ауыр бөлігі, қайғы мен үмітке толы кезеңі – Сталинград шайқасына қатысқан. Осы шайқаста майданның алғы шебіне көмек қолы ретінде жіберілген 122 атқыштар бригадасының құрамы Волга өзенін жүзіп өту барысында жаудың қарша боратқан снарядтарының астында қалады. Талай тағдыр үзілген сол шайқаста Әкімбай ақсақал ауыр жарақат алып, 1943 жылға дейін госпитальға жатқызылады. Сол жылы туған еліне оралып, 40 жыл бойы табан аудармай туып-өскен Тұрбаттағы ауыл шаруашылығы саласында еңбек етеді. Соғыста көрсеткен жауынгерлік ерлігі үшін ІІ дәрежелі «Отан соғысы» орденімен, «Германияны жеңгені үшін» медалімен және бірнеше мерекелік медальмен марапатталған. Бүгінде ақсақал 4 ұл, 2 қызы, 21 немере, 6 шөбере, 2 шөпшегінің қызығын көріп отыр.
Ал осы ауданның тумасы, Сынтас ауылының даңқты ардагері Анарбай Мырзахметов ақсақал биыл 99 жасқа шығады. Соғысқа 1944 жылы өз еркімен аттанған жауынгер Семей қаласында бір айлық дайындық курсынан өтіп, содан Польшаның Варшава қаласына барып, 1-ші Беларусь фронтында болған. Украина майданында жүрген қиян-кескі шайқастарға қатысқан. Польшаның Варшава қаласын, Германияның Магденбург, Бланкенбург, Берлин қалаларын азат ету әскери операцияларына да қатысып, жауынгерлік шеберлігін көрсете білген. «Ерлігі үшін», «Берлинді алғаны үшін», «Германияны жеңгені үшін» медальдарымен наградталған. Соғыс біткен соң Ресейдің Иванов қаласында Әуе-десант әскерінде әскери борышын өтеп, 1950 жылдың қазан айында елге оралады. 1950 жылы Отан алдындағы борышын өтеп, туған жеріне келіп, ұзақ жылдар бойы «Жаңатұрмыс» ұжымшарында ферма меңгерушісі, жүргізуші болып еңбек еткен. 3 ұл, 7 қыз өсіріп, 48 немере, 92 шөбере, 3 шөпшек сүйіп отыр.
Жеңіс жауынгерлерінің ерлік жолы – кейінгі толқын ұрпақтарға мәңгілік үлгі-өнеге. Жауынгерлік парыз, Отан алдындағы борыш, елдің тұтастығына қорған болу – мәңгілік ескірмейтін құндылықтар. Ұрпақ тәрбиесі ісінде ұлтымыздың қаһармандық үлгі-өнегесін көрсеткен осынау батыр аталарымызға әрқашан ел құрметі ерекше.
Н.НАЗАРБЕК